კომენტარი

კითხვები იმ ჟურნალისტებს და ე.წ ექსპერტებს უჩნდებათ, რომლებიც თავად არიან ჟანგბადი ტერორისტებისთვის - ნიკა ლალიაშვილი

უსაფრთხოების საკითხებში ექსპერტი ნიკა ლალიაშვილი აცხადებს, რომ საქართველოში გამართული უსაფრთხოების სისტემა მუშაობს.

ამის შესახებ ლალიაშვილმა „ტვ პირველის“ ეთერში განაცხადა.

„არავითარი შეკითხვები არ მაქვს, პირიქით, მინდა მივულოცო საქართველოს, ჩვენი ქვეყნის სპეცსამსახურებს ბრწყინვალედ ჩატარებული სპეცოპერაცია. ძალიან ბევრი, ძლიერი ქვეყნის სპეცსამსახური ინატრებდა ასე იუველიურად ჩატარებულ ოპერაციას, რომლის შედეგად საერთაშორისო მასშტაბის ტერორისტის ლიკვიდირება მოხდა.

დამატებითი შეკითხვები უჩნდებათ მხოლოდ იმ ჟურნალისტებს და ე.წ ექსპერტებს, რომლებზეც მარგარეტ ტეტჩერი ამბობდა, რომ სწორედ ისინი არიან ჟანგბადი ტერორისტებისთვის. რაც მეტი დამატებითი შეკითხვა გაჩნდება, მით უფრო ცხადყოფს რომ ჩვენი საზოგადოება არ არის მომწიფებული იმისათვის, რომ ებრძოლოს ტერორიზმს.

შეკითხვები თუ არის, ყველა შეკითხვას, ძალიან სწორად დაგეგმილად გაეცა პასუხი სახელმწიფო სტრუქტურების მხრიდან.

რაც შეეხება არალეგალურ შემოსვლას, იმდენად დილეტანტურია ამაზე ლაპარაკი, რომ ძალიან შორს წაგვიყვანს. ძალიან მოკლედ გეტყვით, არალეგალური გადაადგილება, მათ შორის არა მარტო ადამიანების, არამედ ტვირთებისა, შეიძლება ეს ტვირთი იყოს იარაღი, ან ნარკოტიკი - არის უდიდესი პრობლემა ამერიკის შეერთებული შტატებისთვისაც.

მხოლოდ რუსეთთან ჩვენ გვაქვს პატარა პანკისის მონაკვეთში, დაახლოებით 150-მდე სამთო ბილიკი, რომელთა გაკონტროლება ფიზიკურად ვერ ხერხდება. ეს არის ურთულესი მონაკვთები. სხა ქვეყნებთანაც საზღვრის აბსოლუტური გერმეტიზაცია არის თითქმის შეუძლებელი. შესაბამისად, ამაზე სპეკულირება უბრალოდ დილეტანტიზმია, თუ კიდევ უფრო შორს არ წავალთ შეფასებებში.

ჯერჯერობით ჩვენ ვხედავთ ფაქტებს და ფაქტები მეტყველებენ იმაზე,რომ საქართველოში მუშაობს გამართული უსაფრთხოების სისტემა“,-განაცხადა ნიკა ლალიაშვილმა.

მონიკა დავლიანიძე