მსოფლიო

კიევზე რუსეთის ჯარების მასირებული შეტევის მსხვერპლთა პატივსაცემად 25 აპრილი უკრაინის დედაქალაში გლოვის დღედ გამოცხადდა

კიევზე რუსეთის ჯარების მასირებული შეტევის მსხვერპლთა პატივსაცემად 25 აპრილი უკრაინის დედაქალაში გლოვის დღედ გამოცხადდა. ინფორმაცია სოციალური ქსელებით გამოაქვეყნა კიევის მერმა ვიტალი კლიჩკომ.

რუსეთის საოკუპაციო ძალებმა კიევზე რაკეტებით და დრონებით შეტევა 24 აპრილს, შუაღამის შემდეგ მიიტანეს.

დღის სამი საათის მონაცემებით, კიევში დაიღუპა 8 და დაშავდა 77 ადამიანი. უკრაინის საგანგებო სიტუაციების სამსახურის სპიკერმა პავლო პეტროვმა გამოცემა „უკრაინსკა პრავდას" უთხრა, რომ ნაპოვნია 8 იდენტიფიცირებული ცხედარი და სხეულის ნაწილები.

კიევში ყველაზე მეტად დაზარალდა სვიატოშინსკის რაიონი, სადაც სარაკეტო დარტყმის შედეგად დანგრეულია მრავალბინიანი სახლი და დაზიანებულია ახლომდებარე შენობები.

უკრაინის საჰაერო ძალების სარდლობის ინფორმაციით, რუსეთის საოკუპაციო ძალებმა უკრაინას შეუტიეს სხვადასხვა ტიპის 215 რაკეტითა და უპილოტო საფრენი აპარატით. მთავარი სამიზნე კიევი იყო.

მასირებული შეტევის შედეგად მშვიდობიანი მოქალაქეები დაშავდნენ უკრაინის ათამდე რეგიონშიც.

დანგრეული ან დაზიანებულია სახლები, სასწავლო და სამედიცინო დაწესებულებები, ადმინისტრაციული შენობები, საწარმოები და სარკინიგზო ინფრასტრუქტურა.

წყარო.