კომენტარი

ხელისუფლებას არავითარი უფლება არ აქვს გაზპრომთან ხელშეკრულება გაასაიდუმლოს და დაუმალოს მოქალაქეებს - ნინო ბურჯანაძე

ნებისმიერი ხელშეკრულება, რომელსაც საქართველოს მოქალაქეების სახელით ხელს აწერს მთავრობა, უნდა იყოს საჯარო, - განუცხადა ჟურნალისტებს ”დემოკრატიული მოძრაობის” ლიდერმა ნინო ბურჯანაძემ.

მისი თქმით, მთავრობამ არ იცის, რომ მეორე მსოფლიო ომის შემდეგ თანამედროვე საერთაშორისო სამართალში აკრძალულია ნებისმიერი საიდუმლო ხელშეკრულების ხელმოწერა.

ბურჯანაძის განცხადებით, ”გაზპრომთან” გაფორმებული ხელშეკრულების გასაიდუმლოება აჩენს საფუძვლიან ეჭვს, რომ აღნიშნული გარიგება ემსახურება კონკრეტული პირების პოლიტიკურ და ფინანსურ ინტერესებს, ხოლო სახელმწიფოს ინტერესები მეორეხარისხოვანია.

”განცხადება იმასთან დაკავშირებით, რომ თურმე ცალკეული ხელშეკრულებები შეიძლება იყოს გასაიდუმლოებული, არის ტყუილი. როგორც ჩანს მთავრობამ არ იცის, რომ მეორე მსოფლიო ომის შემდეგ თანამედროვე საერთაშორისო სამართალში აკრძალულია ნებისმიერი საიდუმლო ხელშეკრულების ხელმოწერა. ხელშეკრულება, რომელიც არ არის საჯარო და არის გასაიდუმლოებული, რომელიც არის სამთავრობო და არა კერძო პირებს შორის დადებული, ითვლება ბათილად. ასე რომ, საქართველოს ხელისუფლებას არავითარი უფლება არ აქვს ხელშეკრულება გაასაიდუმლოს და დაუმალოს საქართველოს მოქალაქეებს. ეს არის უკანონობა. ხელშეკრულების გასაიდუმლოება ბუნებრივია აჩენს საფუძვლიან ეჭვს იმასთან დაკავშირებით, რომ აღნიშნული გარიგება ემსახურება კონკრეტული პირების პოლიტიკურ და ფინანსურ ინტერესებს, ხოლო სახელმწიფოს ინტერესები მეორეხარისხოვანია. აქედან გამომდინარე, ყველა გონიერი და პასუხისმგებლობის მქონე ადამიანი მიიჩნევს, რომ ხელშეკრულება უნდა გასაჯაროვდეს“, - განაცხადა ნინო ბურჯანაძემ.