კომენტარი

ხელისუფლებამ ისეთივე დრამატული შეცდომა დაუშვა, როგორც თავის დროზე, სააკაშვილის ხელისუფლებამ-გიორგი თარგამაძე

ჟურნალისტი გიორგი თარგამაძე მიიჩნევს, რომ ის რაც დღეს რუსთავი2-თან დაკავშირებით ხდება, მას უკვე გავლილი აქვს, რადგან მაშინ მიხეილ სააკაშვილის ხელისუფლებამ ტელეკომპანია „იმედი“ და სხვა ტელეკომპანიები დახურა.

თარგამაძეს განცხადებით, დღევანდელი ხელისუფლება წინა ხელისუფლების შეცდომებს იმეორებს.

„როდესაც ადამიანი მე მხედავს ამა თუ იმ ტელევიზიის ეთერში, ახსენდება მაშინდელი „იმედი“. ეს ყველაფერი ჩვენ გამოვიარეთ. „იმედი“ არ ყოფილა პირვლი ტელევიზია, რომელზეც მაშინ განხორციელდა შეტევა. „იმედი“იყო ბოლო, მნიშვნელოვანი წერტილი, თორე მანამდე ძველმა ხელისუფლებამ ნაბიჯ-ნაბიჯ, გეგმაზომიერად მიდიოდა საინფორმაციო სივრცის სრული ათვისებისკენ და მონოპოლიზაციისაკენ.

შესაბამისად, დღევანდელი სურათი დიდად არ განსხვავდება ამისგან. თუ შეტევის ობიექტები მაშინ სხვა ტელევიზიები იყვნენ, დღეს სხვანი არიან, მაგრამ შინაარსი იგივეა.

ვიტყოდი, რომ შედეგიც იგივეა და სამწუხაროდ, ისეთივე მძიმე იქნება მთელი ქვეყნისთვის და ჩვენი მოსახლეობისთვის, როგორიც იყო, თავის დროზე, ტელეკომპანია „იმედის“ მიმართ განხორციელებული შეტევის შედეგად.

მაშინ „იმედის“ ასეთი ბრუტალური, ველური ხერხებით დარბევას, ვიზუალური თვალსაზრისით, საერთაშორისო ორგანიციების მხრიდან, თუ ქვეყნის შიგნით ნეგატიური რეაქციები მოჰყვა, სხვა ემოციებს, უფრო მძიმე ემოციებს იწვევდა.

ამ გადაწყვეტილებით საქართველოს ხელისუფლებამ დაუშვა ისეთივე დრამატული შეცდომა, როგორც თავის დროზე, სააკაშვილის ხელისუფლებამ ტელეკომპანია „იმედის“ დარბევისა და დახურვის შედეგად“,-აღნიშნა თარგამაძემ.

მონიკა დავლიანიძე