მსოფლიო

კანადის პარლამენტმა მარიხუანის მოხმარების ლეგალიზება მოახდინა

კანადის პარლამენტმა მარიხუანის მოხმარების ლეგალიზება მოახდინა. კანონპროექტს 52-მა სენატორმა დაუჭირა მხარი, წინააღმდეგ კი 29 წავიდა.

BBC-ის ინფორმაციით, კანონი ძალაში 2018 წლის სექტემბრიდან შევა.

მარიხუანას ლეგალიზება მოქმედი პრემიერის, ჯასტინ ტრიუდოს წინასაარჩევნო დაპირება იყო.

„ჩვენი ბავშვებისთვის მარიხუანას შოვნა ძალიან ადვილი იყო, ისევე როგორც დამნაშავეებისთვის - სარგებლის მიღება. დღეს ჩვენ ამას ვცვლით. მარიხუანას ლეგალიზაციისა და ბაზრის რეგულირების ჩვენი გეგმა სენატმა დაამტკიცა“, - წერს ტრიუდო „ტვიტერის“ საკუთარ გვერდზე.

ახალი კანონის თანახმად, კანადაში მარიხუანის გაყიდვა დაიწყება გარდამავალი პერიოდის შემდეგ, რომელიც 8-დან 12 კვირამდე გასტანს. ამ პერიოდის განმავლობაში რეგიონების ხელმძღვანელებმა უნდა შეიმუშავონ კანაფის გაყიდვის წესები.

ახალი კანონის ამოქედების შემდეგ, ყველა სრულწლოვან კანადელს უფლება ექნება პირადი მოხმარებისთვის საკუთარ სახლში გაზარდოს კანაფის მაქსიმუმ 4 მცენარე, ასევე თან იქონიოს 30 გრამამდე გამომშრალი მარიხუანა.

კანადა G7-ის წევრი პირველი ქვეყანაა, სადაც მარიხუანის ფლობა, მოხმარება და გაყიდვა ნებადართული გახდა.