კომენტარი

კახა კუკავა მოუწოდებს პარლამენტის წევრებს, მხარი არ დაუჭირონ მთავრობის ახალ შემადგენლობას

პარტია „თავისუფალი საქართველო“და მისი ლიდერი კახა კუკავა საქართველოს პარლამენტის წევრებს მოუწოდებს მხარი არ დაუჭირონ მთავრობის ამ კორუმპირებულ შემადგენლობას, რომელიც დღეს პრემიერ-მინისტრის მოვალეობის შემსრულებელმა დაასახელა.

მედიანიუსი კახა კუკავას განცხადებას უცვლელად გთავაზობთ.

„საქართველოს პრემიერ-მინისტრმა, საქართველოს მოსახლეობას მთავრობის ახალი შემადგენლობა წარუდგინა, სადაც უმნიშვნელო კორექტივების გარდა, ყველა წამყვანი მინისტრი თავის პოზიციას ინარჩუნებს.

მიგვაჩნია, რომ აღნიშნული ფაქტი ქართული საზოგადოების აბუჩად აგდებაა, ვინაიდან წინასაარჩევნო კამპანიის დროს „ქართული ოცნება“ ხშირად აცხადებდა, რომ მომავალი ოთხწლიანი ციკლის მანძილზე იქნებოდა მნიშვნელოვანი ცვლილებები და განახლებები, მათ შორის მთავრობის შემადგელობაში.

ახალ შემადგენლობაში გვსურს განსაკუთრებული უნდობლობა გამოვუცხადოთ იუსტიციის მინისტრ თეა წულუკიანს, რომელიც პასუხისმგებელი არის სასამართლო სისტემაში მურუსიძის კლანის გაბატონებასა და სამართლიანობის აღდგენის პროცესის კრახზე. იუსტიციის მინისტრის პოსტზე წულუკიანის დატოვება ნიშნავს იმას, რომ მომავალი ოთხი წლის მანძილზე მოქალაქეები, რომლებიც მართლმსაჯულების განხორციელებას ელოდებოდნენ, საქართველოს ხელისუფლების მიერ კვლავინდებურად იგნორირებული იქნებიან.

აგრეთვე, გვსურს საქართველოს მთავრობაში განსაკუთრებული უნდობლობა გამოვუცხადოთ კალაძე - ქუმსიშვილის წყვილს, რომლებიც კორუფციის ძირითად ტანდემს წარმოადგენენ. მათი საშუალებით ბიძინა ივანიშვილი საქართველოს მოქალაქეებისა და ბიუჯეტის ძარცვას წარმატებით ახორციელებს. კალაძე - ქუმსიშვილის ტანდემის შენარჩუნება ნიშნავს იმას, რომ ქვეყანაში პრინციპულად არ შეიცვლება საინვესტიციო კლიმატი, არ მოიმატებს პირდაპირი უცხოური ინვესიტიცების რაოდენობა, არ გაიზრდება ეკონომიკური მაჩვენებლები - ერთადერთი, რაც ქვეყანაში უახლოეს წლებში გაიზრდება, იქნება ლარის კურსი და უმუშევრობა.

საქართველოს პარლამენტის წევრებს, ვინც საკუთარ თავს ანგარიშვალდებულად მიიჩნევენ არა ბიძინა ივანიშვილის, არამედ საქართველოს მოქალაქეების წინაშე, მოვუწოდებთ მხარი არ დაუჭირონ მთავრობის ამ კორუმპირებულ შემადგენლობას“,-ნათქვამია განცხადებაში.

მონიკა დავლიანიძე