კომენტარი

კახა კალაძეს უნდა ეყოს ვაჟკაცობა, გამოვიდეს და თქვას, რომ საქართველოს ომი არ დაუწყია - ოთარ კახიძე

პარლამენტის ფრაქცია „ევროპული საქართველოს“ თავმჯდომარე, ოთარ კახიძე ქართველი სამხედროების შესაძლო გასამართლებასთან დაკავშირებით პარტია „ქართული ოცნების“ გენერალური მდივნის, კახა კალაძის განცხადებას ეხმაურება.

საუბარია კახა კალაძის საგანგებო ბრიფინგზე, სადაც მან ოპოზიცია სიცრუეში დაადანაშაულა იმასთან დაკავშირებით, რომ ჰააგის სისხლის სამართლის სასამართლოში შესაძლოა, ქართველი სამხედროები გასამართლდნენ. კალაძის თქმით, ეს ყველაფერი ენმ-ს მიერ არის გამოგონილი და რეალობას არ შეესაბამება.

ოთარ კახიძე კახა კალაძეს მოუწოდებს აღიაროს, რომ საქართველოს ომი არ დაუწყია.

„კახა კალაძეს თითების შვერის ნაცვლად, უნდა ეყოს ვაჟკაცობა, გამოვიდეს და თქვას, რომ საქართველოს ომი არ დაუწყია, საქართველოს მაშინდელ ხელისუფლებას ომი არ დაუწყია და ეს ერთი და იგივეა და დადგნენ ამ ვიწროპარტიულ ინტერესებზე, პოლიტიკურ ბოღმაზე მაღლა,“ - განაცხადა კახიძემ.

ოპოზიციონერი დეპუტატი ამბობს, რომ თუ ჰააგის სასამართლოში რომელიმე სამხედრო გასამართლდება, მაშინ ეს ქვეყნის იმიჯს დააზარალებს.

„თუ ვინმემ გაამტყუნა ქართველი სამხედროები, მაშინ გამტყუნდება საქართველო, ვინაიდან ეს სამხედროები ინდივიდუალურ, დამოუკიდებელ მოქმედებებს არ ახორციელებდნენ, ისინი მოქმედებდნენ მაშინდელი ხელისუფლების, მაშინდელი საქართველოს ხელმძღვანელობის დავალებით,“ - განაცხადა კახიძემ.

ოთარ კახიძე ასევე აკრიტიკებს იუსტიციის მინისტრს, თეა წულუკიანს, რომელმაც აღნიშნა, რომ სისხლის სამართლის საერთაშორისო სასამართლოს პროკურორმა შესაძლოა, აგვისტოს ომის მონაწილეების დაკავების მოთხოვნით, ჰააგის სასამართლოს მიმართოს.

„ჰააგის ტრიბუნალს საქმე წულუკიანმა გადასცა. ხომ ვიცით, რომ თქვა, რომ მე აქ ვეღარ ვიძიებ, თქვენ გამოიძიეთო. რატომ გააკეთა ეს, რატომ დააყენა საფრთხის ქვეშ, რატომ გარისკა, მე ვეჭვობ, რომ აქ ძალიან მძიმე შემთხვევასთან გვაქვს საქმე,“ - განაცხადა ოთარ კახიძემ.