კომენტარი

კახა კალაძე ალეკო ელისაშვილზე: ადამიანი, რომელიც არის ჩვეულებრივი უქნარა, ნაცარქექია

გაუგებარია, რამდენად უნდა გავაკეთო კომენტარი ადამიანის განცხადებაზე, რომელსაც ცხოვრებაში არაფერი შეუქმნია, ადამიანი, რომელიც არის ჩვეულებრივი უქნარა, ნაცარქექია, - ასე უპასუხა თბილისის მერმა კახა კალაძემ დედაქალაქის მერობის ყოფილი კანდიდატის, ალექსანდრე ელისაშვილის განცხადებას ღამის ეკონომიკის განვითარების საკითხთან დაკავშირებით.

დედალაქის მერის თქმით, ღამის ეკონომიკის განვითარება მისი წინასაარჩევნო დაპირება იყო და ამას აუცილებლად შეასრულებს.

„გაუგებარია, რამდენად უნდა გავაკეთო კომენტარი ადამიანის განცხადებაზე, რომელსაც ცხოვრებაში არაფერი შეუქმნია. ადამიანი, რომელიც არის ჩვეულებრივი უქნარა, ნაცარქექია. მე მაქვს ჩემი ხედვა, რომელსაც დედაქალაქის მოსახლეობის უმრავლესობამ დაუჭირა მხარი. შესაბამისად, ჩემი დაპირება რაც იყო წინასაარჩევნოდ, ვალდებული ვარ, ეს დაპირება შევასრულო. აუცილებლად გავაკეთებ იმას, რომ თბილისი იქნება სიცოცხლით სავსე ქალაქი“, - განაცხადა კალაძემ.

შეგახსენებთ, რომ დედაქალაქის მერმა თბილისის მთავრობის გუშინდელ სხდომაზე თბილისის ღამის ეკონომიკის განვითარების პროექტის ხელმძღვანელად სერგი გვარჯალაძე წარადგინა.

კალაძის ინიციატივას გუშინვე გამოეხმაურა ალექსანდრე ელისაშვილი.

„რა ღამის ეკონომიკა, რა გარიჟრაჟის და დოლ-გარმონის, ალიონზე შეგებების ადმინისტრაცია, მერიაში არსებობს ეკონომიკური განვითარების სამსახური, დილის ეკონომიკაც შედის იმაში, შუადღის ნაბახუსევზე გამოსვლაც და საღამოს დაისიც რას იგონებენ, ეს არის ხალხის აგდება და თავის თავის აგდებაც,“ - განაცხადა ელისაშვილმა ,,პალიტრანიუსის“ ეთერში.

ნინო ექვთიმიშვილი