კომენტარი

ივანიშვილს ჩემი საქართველოში ჩამოსვლის ეშინია -მიხეილ სააკაშვილი

საქართველოს ყოფილი პრეზიდენტი და ოდესის ექს-გუბერნატორი მიხეილ სააკაშვილი პრანკერისა და შს მინისტრის, გიორგი მღებრიშვილის სავარაუდო სატელეფონო საუბარს გამოეხმაურა.

სააკაშვილის თქმით, ეს აუდიოჩანაწერი ადასტურებს, რომ მის წინაარმდეგ წაყენებული ბრალდებები ფალსიფიცირებულია და პოლიტიკურ ხასიათს ატარებს.

სააკაშვილის მტკიცებით, მისი თბილისში გამოჩენისთანავე მოსახლეობა საქართველოს ამჟამინდელ მთავრობას გადააყენებს, თუმცა ქვეყნის ექს-პრეზიდენტის თქმით, მას სხვა გეგმები აქვს. როგორც მან ფეისბუკის საკუთარ გვერდზე დაწერა, ის უკრაინის გათავისუფლებას აპირებს მოლდაველი და დონეცკელი ოლიგარქებისგან.

„რუსი ოლიგარქის, ივანიშვილის მინისტრმა აღიარა „ავაკოვთან“ საუბარში ის, რასაც ყოველთვის ვამბობდი - ჩემ წინააღმდეგ წაყენებული ყველა საქმე ფალსიფიცირებულია და სუფთა პოლიტიკურ ხასიათს ატარებს.

ივანიშვილს ჩემი საქართველოში ჩამოსვლის ეშინია, რადგან ქართველი ხალხი, რომელსაც საკმარისი მასალა აქვს ჩემი მმართველობის ოლიგარქიული წნეხთან შესადარებლად, გამოვა ქუჩაში და წალეკავს მათ, როგორც კი თბილისში გამოვჩნდები. თუმცა ჩემი უახლოესი გეგმები უკრაინას უკავშირდება და მის გათავისუფლებას მოლდაველი და დონეცკელი ოლიგარქებისგან“, - დაწერა სააკაშვილმა ფეისბუკის საკუთარ გვერდზე.

შეგახსენებთ, 12 აგვისტოს Страна.უა-ზე გავრცელდა ინფორმაცია, რომ რუსმა პრანკერმა ლექსუსმა (ალექსეი სტოლიაროვმა) უკრაინის შინაგან საქმეთა მინისტრის, არსენ ავაკოვის სახელით საქართველოს შინაგან საქმეთა მინისტრს გიორგი მღებრიშვილს დაურეკა. როგორც პრანკერმა რუსულ მედიას განუცხადა, ის მღებრიშვილს სააკაშვილის ექსტრადირებაზე ესაუბრა, თუმცა შინაგან საქმეთა მინისტრმა საქართველოს ყოფილი პრეზიდენტის საქართველოში გადმოყვანაზე უარი თქვა და განაცხადა, რომ საქართველოს ის არ სჭირდება. როგორც პრანკერი ყვება, მღებრიშვილმა სააკაშვილს ავანტურისტი უწოდა და ურჩია, რომ „ჯობია, უსახლკარო იყოს, ვიდრე საქართველოში ციხეში იჯდეს“. გავრცელებული ჩანაწერის მიხედვით, ქართულ მხარეს არ სურს სააკაშვილისგან „გმირის გამოყვანა“.

შემდგომ საქართველოს შინაგან საქმეთა სამინისტროს პრესსამსახურმა აღნიშნული სატელეფონო საუბარი უარყო და განაცხადა, რომ არასერიოზულია იმის დაშვება, რომ ორივე ქვეყნის შს მინისტრები სახელმწიფოებრივად მნიშვნელოვან თემებს განიხილავენ არადაცული სატელეფონო კავშირის მეშვეობით.