კომენტარი

ივანიშვილმა გვითხრა, თუ ბიზნესზე ზეწოლა მოხდება, ხმამაღლა იყვირეთ, მაუპატიურებენო, ახლა გამოდის, ბიზნესს აუპატიურებენ - დავით ჭიჭინაძე

სკანდალურ ფარულ ჩანაწერებს, რომელიც „ომეგა ჯგუფის“ საქმეს უკავშირდება, პარლამენტის წევრი დავით ჭიჭინაძე გამოეხმაურა.

დეპუტატმა ბიძინა ივანიშვილის სიტყვები გაიხსენა, როცა პრემიერ-მინისტრობის დროს თქვა, რომ თუ ბიზნესზე ზეწოლა განხორციელდება, ხმამაღლა "იყვირეთ, რომ მაუპატიურებენო".

"ქართული ოცნების" ყოფილი წევრის დავით ჭიჭინაძის შეფასებით, სკანდალური ჩანაწერებიდან იკვეთება, რომ ხელისუფლების მხრიდან ბიზნესის რეკეტი ხდება და შესაბამისად, გამოდის, რომ „ბიზნესს აუპატიურებენ“.

„გავახსენებ საზოგადოებას, როდესაც ბიძინა ივანიშვილი იყო პრემიერ-მინისტრი, ბიზნესმენებთან შეხვედრაზე დაისვა კითხვა, სადაც ითქვა, რომ ბიზნესმა და ხელისუფლებამ უნდა ითანამშრომლონო და იქ ივანიშვილის პასუხი იყო, რომ როგორც კი ვინმე მოგეკარებათ, იყვირეთ - მაუპატიურებენო. დრო დადგა, რომ სინამდვილეში ეს სიტუაცია ჩვენს ქვეყანაში დაბრუნდა, რადგან კულუარულად ბიზნესს აუპატიურებენ. ამდენი ხანი, რომ პროკურატურა დუმს, ეს არის ყველაზე შემაშფოთებელი,“- განაცხადა დავით ჭიჭინაძემ.