კომენტარი

ივანიშვილიც ამბობს, რომ არ ყოფილა 4 მილიონის გამოძალვა ბანკიდან, მაგრამ მე მაქვს წერილობითი ფაქტები - ზაზა ოქუაშვილი

„ივანიშვილი ამბობს, რომ არ ყოფილა 4 მილიონის გამოძალვა ბანკიდან, მაგრამ მე მაქვს წერილობითი ფაქტები, სადაც გარკვევითაა აღნიშნული, რომ ეს პირობები არის მიმართული ფინანსთა სამინისტროსთან“, - ამის შესახებ გადაცემაში „360 გრადუსი“ „ომეგა ჯგუფის“ დამფუძნებელმა ზაზა ოქუაშვილმა განაცხადა.

მისი თქმით, ხელისუფლება ცდილობდა, ჯგუფში შემავალი კომპანიებისთვის ხელოვნური ბარიერები შეექმნა, რათა ისინი ბაზრიდან გამქრალიყვნენ. გადაცემაში საუბრისას ოქუაშვილმა აღნიშნა, რომ ხელისუფლება ბიზნესექტორის დამორჩილებას ცდილობს, ხოლო ვინც დათმობებზე არ მიდის, ხელოვნურ პრობლემებს უქმნიან.

ბიზნესმენმა ასევე ისაუბრა „რუსთავი 2“-ის მიერ გამოქვეყნებულ ფარულ ჩანაწერზე, რომელიც, არხის ცნობით, 26 ოქტომბრითაა დათარიღებული. ფარულ ჩანაწერში, ტელეკომპანიის ცნობით, ფინანსთა მინისტრი ივანე მაჭავარიანი, შემოსავლების სამსახურის უფროსი/ ფინანასთა მინისტრის მოადგილე მიხეილ დუნდუა და „ომეგა ჯგუფში“ შემავალი კომპანიის ერთ-ერთი დირექტორი გიორგი ქურდაძე კომპანიისთვის ვალების ჩამოწერის შესახებ საუბრობენ. ჩანაწერის მიხედვით, შეხვედრაზე ფინანსური შეთანხმება ირჩევა, რომლის მიხედვითაც, ტელეკომპანიის ცნობით, „ომეგა ჯგუფს“ ათეულობით მილიონიანი ვალი უნდა ჩამოეწეროს.

„მინისტრი ბევრ რამეს ამბობს. ივანიშვილიც ამბობს, რომ არ ყოფილა 4 მილიონის გამოძალვა ბანკიდან, რომ ბანკს არ გაუცია ეს 4 მილიონი. ბევრ რამეს ამბობენ, მაგრამ ჩვენ გვაქვს ფაქტები, წერილობითი. მე მაქვს წერილობითი ფაქტები, სადაც ძალიან გარკვევითაა აღნიშნული, რომ აღწერილი პირობები არის მიმართული ფინანსთა სამინისტროსთან და ინგლისის ელჩთან და საგარეო საქმეთა სამინისტროში ასლი დევს “, - განაცხადა ოქუაშვილმა.