მსოფლიო

იტალიაში სამი მიწისძვრა მოხდა

ცენტრალურ იტალიაში ერთი საათის განმავლობაში სამი მიწისძვრა მოხდა, რომელთა სიმძლავრე 5.3-დან 5.7 მაგნიტუდამდე მერყეობდა.

მიწისქვეშა ბიძგები იგრძნობოდა რომშიც, ეპიცენტრიდან დაახლოებით 100 კილომეტრის რადიუსში. ამის გამო დაიკეტა რომის მეტრო და სკოლებში მოხდა ევაკუაცია.

მოჰყვა თუ არა მიწისძვრას მსხვერპლი, ჯერჯერობით უცნობია.

ადგილობრივი მთავრობების თქმით, ზარალის დადგენა გაჭირდება ძლიერი თოვლის გამო, რომელიც ართულებს ტრანსპორტის გადაადგილებას ცენტრალურ იტალიაში.

“ყველა ქუჩაშია. ძალიან ცივა და ძლიერი ქარი უბერავს“, - ამბობს სოფელ ჩეზელის მკვიდრი ლინა მერკანტინი. დასახლება ეპიცენტრიდან 80 კილომეტრითაა დაშორებული.

2016 წლის 24 აგვისტოს ქალაქ ამატრიჩეში მომხდარ მიწისძვრას 300 ადამიანი ემსხვერპლა. ათასობით შენობა კი დაინგრა. წინა წლის ოქტომბერში იტალიაში 6.6. მაგნიტუდის სიმძლავრის მიწისძვრა დაფიქსირდა - ყველაზე მძლავრი 36 წლის განმავლობაში.

ანა მებურიშვილი