მსოფლიო

ისრაელის პრემიერ-მინისტრმა ბენიამინ ნეთანიაჰუმ თავდაცვის მინისტრის პოსტი შეითავსა

ისრაელის პრემიერ-მინისტრმა ბენიამინ ნეთანიაჰუმ სამთავრობო კოალიციის შიგნით არსებული წინააღმდეგობის მიუხედავად თავდაცვის მინისტრის პოსტი შეითავსა.

გარდა ამისა, ის ვადამდელი არჩევნების წინააღმდეგ გამოვიდა. ნეთანიაჰუს განცხადებით, ეს „უპასუხისმგებლობა“ იქნება ქვეყნის უსაფრთხოების ამჟამინდელი გამოწვევების გამო.

„ასეთ პერიოდში არ შეიძლება მთავრობის დაშლა, ასეთ პერიოდში არ შეიძლება არჩევნებზე წასვლა“, - განაცხადა ნეთანიაჰუმ რეგიონში არსებულ დაძაბულობაზე საუბრისას.

„ჩვენ წინ მთელი წელი გვაქვს არჩევნებამდე, ჩვენ ვართ გაცხარებულ ბრძოლაში, და შუა ბრძოლას ვერ მიატოვებ.

შუა ბრძოლისას პოლიტიკას ვერ ითამაშებ. ქვეყნის უსაფრთხოება პოლიტიკის მიღმაა, და ქვეყნის უსაფრთხოება პიროვნული შეხედულებების მიღმაა“, -აღნიშნა ისრაელის პრემიერ-მინსიტრმა.

ცნობისთვის, 14 ნოემბერს ისრაელის თავდაცვის მინისტრმა ავიგდორ ლიბერმანმა თავდაცვის მინისტრის პოსტი დატოვა. ამ ფორმით მან გააპროტესტა ისრაელის ხელისუფლების გადაწყვეტილება ღაზის სექტორში ცეცხლის შეწყვეტის შესახებ.

ლიბერმანმა ისრაელსა და დაჯგუფება ჰამასს შორის დადებული ზავი „ტერორისადმი დამორჩილება“ უწოდა.

„ის, რასაც ვაკეთებთ, როგორც სახელმწიფო, არის მოკლევადიანი სიმშვიდის ყიდვა, რომლის ფასი იქნება ეროვნული უსაფრთხოებისთვის სერიოზული გრძელვადიანი ზიანის მიყენება “, -განაცხადა ლიბერმანმა.

ლიბერმანმა ასევე განაცხადა, რომ მისი პარტია დატოვებს პრემიერ-მინისტრ ბენიამინ ნეთანიაჰუს კოალიციას.