მსოფლიო

ისრაელი და „ჰამასი“ ებრაელი ჯარისკაცის მოკვლისა და ღაზას სექტორის დაბომბვის შემდეგ სიმშვიდის აღდგენაზე შეთანხმდნენ

ისრაელი და ტერორისტული ორგანიზაცია „ჰამასი“ ღაზას სექტორში სიმშვიდის აღდგენაზე შეთანხმდნენ.

„ეგვიპტისა და გაერთიანებული ერების ძალისხმევით ისრაელი და პალესტინური დაჯგუფება შეთანხმდნენ, რომ დაუბრუნდებიან სიმშვიდის ეპოქას“, - განუცხადა სააგენტო „როიტერსს“ „ჰამასის“ პრესსპიკერმა ფაუზი ბარჰუმმა.

ისრაელის ჯარის პრესსპიკერმა, თავის მხრივ, განაცხადა, რომ შაბათს, დილის საათებში არ დაფიქსირებულა რამე სახის სამხედრო მოქმედება ღაზას სექტორში.

ცნობისთვის, პარასკევს პალესტინელმა სნაიპერმა ებრაელი ჯარისკაცი მოკლა ღაზას სექტორის საზღვართან. ამის საპასუხოდ ისრაელის ჯარმა ათობით იერიში მიიტანა ღაზას სექტორზე, რის შედეგად 4 პალესტინელი მოკვდა, აქედან 3 „ჰამასის“ მებრძოლია. სულ მცირე ღაზას სექტორის 120 მკვიდრი დაშავდა.

ისრაელის ჯარის განცხადებით, მათ გაანადგურეს „ჰამასის“ 68 ობიექტი და 60-მდე შენობა.

ანა მებურიშვილი