კომენტარი

ის რომ აფგან მუხტარლი არის უკვე სხვა ქვეყანაში, გაართულებს გამოძიებას - თეა წულუკიანი

საქართველოს იუსტიციის მინისტრის, თეა წულუკიანის განცხადებით, ის ფაქტი, რომ აფგან მუხტარლი უკვე სხვა ქვეყანაში იმყოფება, გაართულებს გამოძიების პროცესს, თუმცა, მინისტრის თქმით, გამოძიება მაინც ჩატარდება, რადგან ეს ქვეყნის პრესტიჟს და სამართალდამცველების რეპუტაციას შეეხება.

ამის შესახებ წულუკიანმა, გადაცემა „მთავარში“ სტუმრობის დროს განაცხადა.

„ის რომ ეს ადამიანი არის უკვე სხვა ქვეყანაში, გაართულებს გამოძიებას, რომ გავარკვიოთ რა არის მომხდარი. ის ძვირფასი ინფორმაცია, რომელიც გამომძიებელს შეიძლება დასჭირდეს, სწორედ ბატონმა აფგანმა იცის, რომელიც ახლა უკვე ბაქოშია. ანუ ვინ იყვნენ ეს ადამიანები, ვინც, როგორც მისი ადვოკატი ბაქოდან გვატყობინებს, ჩასვა ძალით მანქანაში, ცემეს კიდეც თურმე და გააქანეს საზღვრისკენ. ვინ იყვნენ, თუ იცნობს მათ, რა ურთიერთობა აკავშირებდა მათთან, რა ენაზე საუბრობდნენ? ძალიან ბევრი კითხვა შეიძლება ჰქონდეს გამომძიებელეს ასეთ დროს. მიუხედავად ამისა, იქნება გაგზავნილი სამართლებრივი დახმარების მოთხოვნა, რომ ან ჩვენი გამომძიებლის მეშვებობით იყოს დაკითხული ეს ადამიანი, ან თავად დაკითხონ. მაგრამ, რას გვიპასუხებენ ჩვენი მეგობარი სტრუქტურები ეს წინასწარ არ ვიცით. იქაც მიდის გამოძიება სხვადასხვზა მუხლით, როგორც აღმოჩნდა. მოკლედ, კომპლექსური, რთული პროცესი გველის წინ, მაგრამ მთავარია, რომ გამოძიება დაწყებულია“,-აღნიშნა მინისტრმა.

მისი თქმით, მოსაფიქრებელია პრევენციული ზომები, რომ მომავალში საქართველოს ტერიტორიაზე რომელიმე ქვეყნის მოქალაქე იგივე ქმედებას არ დაექვემდებაროს.

„უნდა დადგინდეს რა მოხდა, იმიტომ რომ ეს ჩვენი ქვეყნის პრესტიჟს ეხება, სამართალდაცველების რეპუტაციას. და ალბათ მოსაფიქრებელი იქნება სერიოზული პრევენციული მექანიზმები, რომ აზერბაიჯანის მოქალაქე იქნება, თუ სხვა ქვეყნის მოქალაქე, რომელიც ჩვენი ქვეყნის ტერიტორიაზე იმყოფება ამგვარ ქმედებას არ დაექვემდებაროს, ვისგანაც არ უნდა იყოს ის“,-განმარტა თეა წულუკიანმა.

მონიკა დავლიანიძე