კომენტარი

„ის, რასაც ოთარ ფარცხალაძის შესახებ ამბობენ, ჭორების სახით მსმენია” - თამარ ჩუგოშვილი პროკურატურას მოუწოდებს, დააჩქაროს ფარცხალაძესა და თორდიას შორის მომხდარ ფაქტზე დაწყებული გამოძიება

პარლამენტის ვიცე-სპიკერი თამარ ჩუგოშვილი პროკურატურას მოუწოდებს, დააჩქაროს ყოფილ მთავარ პროკურორს ოთარ ფარცხალაძესა და გენერალურ აუდიტორს ლაშა თორდიას შორის მომხდარ ფიზიკური დაპირისპირების ფაქტზე დაწყებული გამოძიება და შედეგი წარმოადგინოს.

„ის, რასაც ოთარ ფარცხალაძის შესახებ ამბობენ, ჭორების სახით მსმენია, მაგრამ შეხება არ მქონია კონკრეტულ ფაქტთან, რაც მის ამ ფორმით ბიზნესში ჩარევას დაადასტურებდა. თუკი ვინმე ასეთ ფაქტებს მომაწვდის, ჩემთვისაც საინტერესო იქნება, რომ გავეცნო.

ერთადერთი რაც არის ცნობილი და ყველაზე თვალნათელი მასთან დაკავშირებით, ეს არის გენერალურ აუდიტორთან დაკავშირებული ფიზიკური კონფლიქტის პრობლემა, რაზეც გამოძიების შედეგები ჯერ ჩვენ არ გვინახავს და უნდა ვნახოთ. ეს არის ძალიან მნიშვნელოვანი. გამოძიება ძალიან დაგვიანებულია და პროკურატურამ ამ გამოძიების შედეგი უნდა დადოს იმისთვის, რომ არ დარჩეს ვინმეს განცდა, რომ არსებობს პირი, რომელსაც კანონის მოთხოვნები შეიძლება არ შეეხოს ან ირიბად შეეხოს.

შემიძლია პროკურატურას მოვუწოდო, რომ დააჩქაროს ამ საქმეზე გამოძიება“, - განაცხადა თამარ ჩუგოშვილმა.