მსოფლიო

„ის ჩვენი მეფე არაა“ - რუსეთის ქალაქებში პუტინის საწინააღმდეგო აქციები მიმდინარეობს

მოსკოვში, პუშკინის მოედანზე რუსეთის პრეზიდენტის, ვლადიმერ პუტინის მეოთხე ინაუგურაციის წინააღმდეგ არასანქცირებული საპროტესტო აქცია „ის ჩვენი მეფე არაა“ მიმდინარეობს. შეკრების ორგანიზატორები ოპოზიციონერი ალექსეი ნავალნის მხარდამჭერები არიან.

რადიო თავისუფლების რუსული სამსახურის ინფორმაციით, აქციაზე კრემლის მხარდამჭერი ორგანიზაციის „ეროვნული გამათავისუფლებელი მოძრაობისა“ და „საბრძოლო ძმობის“ წარმომადგენლები მივიდნენ, რომლებიც გაჰყვიროდნენ ლოზუნგებს „მაიდანის“ წინააღმდეგ და ნავალნის პროვოკატორს ეძახდნენ.

გარდა ამისა, ნავალნის მხარდამჭერებსა და კაზაკების ფორმაში გამოწყობილ პირებს შორის დროდადრო სიტყვიერი დაპირისპირება ხდება.

მოსკოვის ცენტრში მობილიზებულია პოლიცია და რუსეთის გვარდიის ქვედანაყოფები. ვრცელდება ინფორმაცია, რომ უკვე დააკავეს ერთი აქტივისტი, რომელსაც ეჭირა პლაკატი „ძირს პუტინი“ (Путина на мыло).

პუტინის საწინააღმდეგო აქციები „ის ჩვენი მეფე არაა“ მიმდინარეობს რუსეთის სხვა ქალაქებში. ზოგან ის მონაწილეთა დაკავებებით დასრულდა.

გავრცელებული ინფორმაციით, ქვეყნის მასშტაბით მიმდინარე აქციებზე 206 ადამიანი დააკავეს.

ვლადიმერ პუტინის ინაუგურაცია 7 მაისს გაიმართება.