მსოფლიო

ირანთან ან შეთანხმებას მივაღწევთ, ან ისეთი მკაცრი რამის გაკეთება მოგვიწევს, როგორიც გასულ ჯერზე გავაკეთეთ - დონალდ ტრამპი

აშშ-ის პრეზიდენტის დონალდ ტრამპის განცხადებით, ირანთან მოლაპარაკებების ჩაშლის შემთხვევაში, ახლო აღმოსავლეთში მეორე ავიამზიდის დამრტყმელი ჯგუფის გაგზავნას განიხილავს.

„ან შეთანხმებას მივაღწევთ, ან ისეთი მკაცრი რამის გაკეთება მოგვიწევს, როგორიც გასულ ჯერზე გავაკეთეთ“, - განუცხადა ტრამპმა Axios-ს.

აშშ-ის პრეზიდენტის თქმით, ის მოელის, რომ აშშ-ირანის მოლაპარაკებების მეორე რაუნდი მომავალ კვირას გაიმართება.

„ჩვენ გვყავს არმადა, რომელიც იქ მიემართება და შესაძლოა, კიდევ ერთი წავიდეს“, - თქვა ტრამპმა და დასძინა, რომ კიდევ ერთი ავიამზიდის დამრტყმელი ჯგუფის გაგზავნაზე ფიქრობს.

„ბოლო ჯერზე მათ არ სჯეროდათ, რომ ამას გავაკეთებდი“, - განაცხადა ტრამპმა, ირანის ბირთვულ ობიექტებზე ივნისში განხორციელებული დარტყმის შესახებ მის გადაწყვეტილებაზე მინიშნებით.

ტრამპის განცხადებით, ირანს ამერიკასთან შეთანხმების მიღწევის სურვილი აქვს და სამხედრო საფრთხის შემდეგ ბევრად უფრო სერიოზულად არის ჩართული პროცესში. მისივე თქმით, გასული წლის ივნისში ამერიკის მიერ ირანის ბირთვულ ობიექტებზე განხორციელებული დარტყმის შემდეგ „მოლაპარაკებები ძალიან განსხვავებულია“.

„ჩვენ შეგვიძლია ირანთან შესანიშნავი შეთანხმების დადება“, – აღნიშნა ტრამპმა.

როგორც აშშ-ის პრეზიდენტმა განაცხადა, შეთანხმება არა მხოლოდ ირანის ბირთვულ პროგრამას, არამედ ირანის ბალისტიკური რაკეტების მარაგსაც უნდა ეხებოდეს.