კომენტარი

ირანის ცენტრში, გულში მიიტანეს იერიში, ეს იგივეა, მოსკოვში, წითელ მოედანზე რომ ტერაქტი განხორციელდეს - ამირან სალუქვაძე

ბრიგადის გენერალი, ანალიტიკოსი სამხედრო-პოლიტიკურ და უსაფრთხოების საკითხებში, ამირან სალუქვაძე მიიჩნევს, რომ ვიდრე მთელი მსოფლიო არ გაერთიანდებიან, ახლო აღმოსავლეთს სიმშვიდე არ ეღირსება.

ამის შესახებ სალუქვაძემ „რეზონანსთან“ საუბარში, თეირანში განხორციელებული ორი თავდასხმის კომენტირბეისას განაცხადა, რომლის შედეგად 12 ადამიანი დაიღუპა. მომხდარზე პასუხისმგებლობა „ისლამურმა სახელმწიფომ“ აიღო.

სალუქვაძის შეფასებით, ტერორიზმის საშიშროება მთელს მსოფლიოშია და მასთან ბრძოლაში ყველა ცივილიზებული სახელმწიფო უნდა იყოს ჩართული.

„თუმცა „ისლამური სახელმწიფო“ და სხვა ტერორისტული ორგანიზაციები კონკრეტულ სამიზნეებს ირჩევენ. ირანის ამორჩევაც შემთხვევითი არ არის. ირანი დღეს აქტიურადაა ჩართული სირიის სიტუაციის დარეგულირებაში და თურქეთთან ერთად, არის ასტანის ფორმატის ერთ-ერთი აქტიური მონაწილე და რეგიონში საკმაოდ მნიშვნელოვანი მოთამაშეა. ის ერთ-ერთ დაინტერესებულ მხარეს წარმოადგენს. ამიტომ, ვფიქრობ, “ისლამური სახელმწიფოს“ აქტიურობა ირანში გასაკვირი არ უნდა იყოს“,- განაცხადა ესქპერტმა.

მისი თქმით, ტერაქტის მიზანი იყო მეტი რეზონანსის გამოწვევა და ობიექტებიც შერჩეული იყო ამ ნიშნით.

„ფაქტობრივად, ირანის ცენტრში, გულში მიიტანეს იერიში. ეს იგივეა, მოსკოვში, წითელ მოედანზე რომ ტერაქტი განხორციელდეს. აღსანიშნავია, რომ ირანის სპეცსამსახურებმა მოკლე დროში, მორიგი ტერაქტის აღკვეთა შეძლეს.

სანამ მთელი მსოფლიო, წამყვანი სახელმწიფოები, არ გაერთიანდებიან, ახლო აღმოსავლეთს დამშვიდება არ უწერია“,-აღნიშნა ამირან სალუქვაძემ.

მონიკა დავლიანიძე