კომენტარი

ირაკლი სესიაშვილი-გიგი წერეთელს: დამისახელეთ ევროპის ქვეყნები, რომლებმაც ალეპოზე რეზოლუცია, ან განცხადება მიიღეს

საპარლამენტო უმრავლესობის წევრის, გიგი წერეთელის განცხადებით, პარლამენტის მიერ ალეპოში მიმდინარე მოვლენებზე განცხადების მიღება მნიშნელოვანია, რადგან საქართველო საერთაშორისო პროცესებში აქტიურად მონაწილეობს.

ამის შესახებ წერეთელმა პარლამენტის ბიუროს სხდომაზე, თავდაცვისა და უშიშროების კომიტეტის თავმჯდომარის მიერ დასმული კითხვის საპასუხოდ განაცხადა.

ბიუროს სხდომაზე ირაკლი სესიაშვილმა სთხოვა გიგი წერეთელს, დაესახელებინა ის ევროპული ქვეყნების პარლამენტები, რომლებმაც ბოლო პერიოდში, მსგავსი ტიპის განცხადება, ან რეზოლუცია აქვთ მიღებული.

გიგი წერეთელმა აღნიშნა,რომ მას ხელთ ეს ჩამონათვალი არ აქვს, თუმცა დაპირდა სესიაშვილს, რომ მოგვიანებით მოაწვდიდა.

„ალბათ უფრო სწორი კითხვა იქნებოდა, რომელმა ქვეყანამ არ გააკეთა ეს. იმიტომ, რომ სირიის კრიზისთან დაკავშირებით სად არ ყოფილა განცხადებები და სად არ ყოფილა პოზიცია გამოხატული, ყოველ შემთხვევაში წამყვან ქვეყნებში. ყველა საერთაშორისო დიდმა ორგანზიაციამ ამაზე არა მხოლოდ გააკეთა განცხადება, იმსჯელა, რეზოლუციები და ასე შემდეგ. ვფიქრობ, რომ ჩვენმა პარლამენტმა აზრი უნდა გამოხატოს ამ საკითხზე. ეს არის მნიშვენლოვანი თემა, მნიშვნელოვანი საქართველოსთვის, როგორც არა პატარა ქვეყნისთვის, არამედ იმ ქვეყნისთვის, რომელიც საერთაშორისო პროცესებში აქტიურ მონაწილოებას ღებულობს და ვფიქრობ, გარკვეული ვალდებულებაც არის, რომ ამ ვითარებაში ჩვენი პოზიცია გამოვხატოთ“,- აღნიშნა გიგი წერეთელმა.

მონიკა დავლიანიძე