კომენტარი

ირაკლი ლექვინაძემ ნაციონალური მოძრაობის ბრალდებას უპასუხა

დედაქალაქის მერის მოადგილემ, ირაკლი ლექვინაძემ თბილისის საკრებულოს ფრაქცია ,,ნაცინალური მოძრაობის’’ იმ ბრალდებებს უპასუხა, რომლის თანახმადაც, მოსამართლე ნატა ნაზღაიძის ოჯახს მერიამ ქრთამის სახით გადასცა 2,5-დან 3 მილიონ ლარამდე ქონება.

,,თბილისის მერია ასეთ სტიქიურ უბედურების ზონაში მიწის ნაკვეთების დათმობისას ხელმძღვანელობდა ორი ნორმით; პირველი უკავშირდება საკრებულოს მიერ დადგენილ წესს ,,საცხოვრისის დათმობისა და მისი უზრუნველყოფის შესახებ’’, რომლის ფარგლებშიც ჩვენ იქ არსებული საცხოვრისების დათმობის სანაცვლოდ მათი ანაზღაურება განვახორციელეთ და მეორე შემთხვევა ეს არის - საზოგადოებრივად აუცილებელი საჭიროებისთვის საკუთრების ჩამორთმევის სამართლებრივი ნორმა, რომლის საფუძველზეც განხორციელდა ნაზღაიძის და ასევე ელიზბარაშვილების ქონების მონაცვლეობა და შესაბამისი თანხის ანაზღაურება’’, - განუცხადა ჟურნალისტებს ირაკლი ლექვინაძემ.

ცნობისათვის: ,,ნაციონალური მოძრაობის’’ ცენტრალურ ოფისში გამართულ ბრიფინგზე, საკრებულოს უმცირესობის წევრმა, მარინა დათუკაშვილმა, ის დოკუმენდაცია გაასაჯაროვა, რომლითაც მისი თქმით, მტკიცდება, რომ მოსამართლე ნაზღაიძის ოჯახმა იმაზე გაცილებით დიდი თანხა მიიღო თბილისის მერიისგან, ვიდრე ეს აქამდე იყო ცნობილი.

მარინა დათუკიშვილის განცხადებით, ეკონომიკის სამინისტრომ სანდრო ეულის ქუჩაზე რამდენიმე დღის წინ აუქციონზე გამოიტანა მიწის ახალი ნაკვეთი, რომელიც მოსამართლის ოჯახისთვის გადაცემული ნაკვეთის გვერდით მდებარეობს.

მისი თქმით, აუქციონზე ახალი ნაკვეთი 2 მილიონ ლარად შეფასდა, ანუ 4 ჯერ უფრო ძვირად, ვიდრე ნაზღაიძის ოჯახისთვის გადაცემული მიწა.

ნინო ექვთიმიშვილი