მსოფლიო

იენს სტოლტენბერგის თქმით, რუსეთს შეუძლია, მეზობლების წინააღმდეგ სამხედრო ძალა გამოიყენოს და ამის მაგალითებია საქართველო და უკრაინა

ნატოს გენერალური მდივნის, იენს სტოლტენბერგის თქმით, ის შეშფოთებულია რუსეთის ახალი სამხედრო შესაძლებლობებით. DW-სთან ინტერვიუში სტოლტენბერგმა აღნიშნა, რომ მოსკოვი აქტიურად ახორციელებს ინვესტიციებს თანამედროვე შეიარაღებაში.

მისი თქმით, რუსეთი მზადაა, გამოიყენოს სამხედრო ძალა მეზობლების წინააღმდეგ და ამის მაგალითად მოიყვანა საქართველოსთან ისტორიული ომი და უკრაინასთან მიმდინარე კონფლიქტი.

„მოსკოვს ასევე ჰყავს ჯარები მოლდოვაში, მოლდოვის ხელისუფლების თანხმობის გარეშე“, - დასძინა სტოლტენბერგმა და ყურადღება გაამახვილა „მრავალი წლის განმავლობაში ჩამოყალიბებულ სქემაზე, რომელსაც სჭირდება პასუხის გაცემა“.

მისი თქმით, „ჩვენ სარკისებურად არ გავიმეორებთ იმას, რასაც რუსეთი აკეთებს. ჩვენ ტანკს ტანკით, ან რაკეტაზე რაკეტით, ან ბირთვული იარაღით ბირთვულ იარაღზე არ ვუპასუხებთ. მაგრამ, რა თქმა უნდა, ჩვენ უნდა დავრწმუნდეთ, რომ ნატო ადაპტირდება, როცა ვხედავთ, რომ მეტად დაჟინებული რუსეთი დიდ ინვესტიციებს დებს ახალ თანამედროვე შეიარაღებაში“.

სტოლტენბერგმა აღნიშნა, რომ სურს, ნატო-რუსეთის ურთიერთობების გაუმჯობესება და დაძაბულობის შემცირება.

„არ გვჭირდება ახალი ცივი ომი. არ გვჭირდება ახალი შეიარაღების რბოლა და არ გვსურს რუსეთის იზოლირება“, - განაცხადა ნატოს გენერალურმა მდივანმა.

სტოლტენბერგმა აღნიშნა, რომ „ჩვენ არ გვსურს, თავდაცვასა და დიალოგს შორის არჩევანის გაკეთება“.