მსოფლიო

ჰამასი დონალდ ტრამპის გადაწყვეტილების საპასუხოდ „მრისხანების დღის“ მოწყობას გეგმავს

პალესტინური დაჯგუფება ჰამასი, რომელიც ღაზის სექტორს აკონტროლებს, დონალდ ტრამპის მიერ იერუსალიმის ისრაელის დედაქალაქად გამოცხადების საპასუხოდ ე.წ. „ინტიფადის“ , ანუ აჯანყების მოწყობას გეგმავს.

ჰამასის ლიდერის ისმაილ ჰანიას განცხადებით, ამ ნაბიჯით აშშ-მ „ომი გამოაცხადა პალესტინელების წინაარმდეგ“ და მოკლა ისრაელ-პალესტინის მშვიდობიანი მოლაპარაკებების პროცესი.

ჰანიამ შესთავაზა პარასკევისთვის „მრისხანების დღის“ მოწყობა. მისი ინფორმაციით, შესაბამის ბრძანებას ჰამასის ყველა წევრი და ქვედანაყოფი ელოდება.

ჰამასის ინიციატივას მხარი დაუჭირა ლიბანურმა დაჯგუფება ჰეზბოლამაც. მისი ლიდერის, ჰასან ნასრალის განცხადებით, ეს აჯანყება უნდა იყოს „ყველაზე მასშტაბური, მნიშვნელოვანი და მრისხანე პასუხი ამერიკის გადაწყვეტილებაზე“.

გუშინ დაახლოებით 30-ზე მეტი პალესტინელი დაშავდა მდინარე იორდანის მარჯვენა სანაპიროსა და ღაზის სექტორში ებრაელ ჯარისკაცებთან მომხდარი შეტაკების შედეგად. პალესტინელები დონალდ ტრამპის გადაწყვეტილებას აპროტესტებდნენ.

ანა მებურიშვილი