კომენტარი

გვჭირდება მანდატურის სამსახური, რომელიც გააძლიერებს პრევენციულ ზომებს და არ დანერგავს პოლიციურ რეჟიმს - მარიამ ჯაში

პარლამენტის განათლების, მეცნიერებისა და კულტურის კომიტეტის თავმჯდომარე მარიამ ჯაში მიიჩნევს, რომ მმართველი გუნდის ოპონენტები ცდილობენ მანდატურის სამსახურის რეფორმა ნეგატიურ კონტექსტში წარმოაჩინონ.

კომიტეტის თავმჯდომარე ხაზს უსვამს, რომ საჭიროა დაინერგოს სისტემა, რომელიც პრევენციულ ზომებს გააძლიერებს და არ დანერგავს პოლიციურ რეჟიმს, როგორც ეს წინა ხელისუფლების დროს იყო.

„ოპონენტები ცდილობენ მანდატურის სამსახურის რეფორმა ნეგატიურ კონტექსტში წარმოაჩინონ. მინდა ცალსახად დაგიდასტუროთ, რომ ბოლო ოთხი წელია მსგავსი მასშტაბის ტრაგედია არ მომხდარა, მანდატურის სამსახური საკუთარი უფლებამოვალეობის ფარგლებში ასრულებდა თავის საქმიანობას.

მე ვფიქრობ, რომ დღეს საუბარი იმაზე, რომ 2012 წელს თურმე არაჩვეულებრივად მუშაობდა მანდატურის სამსახური - არასწორია. ჩვენ ყველას გვახსოვს, 2012 წელი როდესაც სამწუხაროდ, გვქონდა ძალოვანი სტრუქტურების გადაჭარბებული უფლებამოსილება ამ ქვეყანაში. ხშირ შემთხვევაში ძალოვანი სტრუქტურები და ადამიანის უფლებათა დამცველი დაწესებულებები თავად გამოდიოდნენ მოძალადის როლში და ეს იყო სისტემური პრობლემა.

დღეს, ჩვენ გვჭირდება სისტემა, რომელიც გააძლიერებს პრევენციულ ზომებს, მაგრამ არავითარ შემთხვევაში არ დანერგავს პოლიციურ რეჟიმს, ან დისციპლინაზე ორიენტირებულ ღონისძიებებს.

ეს იქნება სისტემა, რომელიც საინფორმაციო კამპანიებით, საკონსულტაციო სერვისებით, ფსიქოლოგიური სერვისების ამოქმედებით, მშობლებთან და საზოგადოებასთან თანმშრომლობით შექმნის იმ დაცულობის სივრცეს ჩვენი შვილებისთვის, რომელიც სწავლის პროცესს არ შეუშლის ხელს და პირიქით, დაეხმარება ჩვენი მომავალი თაობის განვითარებას და ჩამოყალიბებას როგორც წარმატებული პიროვნებებისა და პროფესიონალების“,-აღნიშნა ჯაშმა.

მონიკა დავლიანიძე