კომენტარი

გურამ დონაძეს უშვებენ ციხეში იმიტომ, რომ მან გააკეთა ფეიჯი „რეზიდენტი სალომე“, სადაც იყო ვიდეოები ივანიშვილის წინააღმდეგ არჩევნების დროს - მიხეილ სააკაშვილი

საქართველოს ექს-პრეზიდენტის, მიხეილ სააკაშვილის მტკიცებით, ბუტა რობაქიძის მკვლელობაში ბრალდებული შინაგან საქმეთა სამინისტროს პრესსამსახურის ყოფილი უფროსი გურამ დონაძე გაასამართლეს იმის გამო, რომ მან გააკეთა გვერდი „რეზიდენტი სალომე“, სადაც აქვეყნებდა ვიდეოებს ბიძინა ივანიშვილის წინააღმდეგ. ამის შესახებ სააკაშვილმა ფეისბუკზე გავრცელებულ ვიდეოში განაცხადა.

„დავით კირკიტაძის დაჭერამდე ორი დღით ადრე გაუშვეს ციხეში, თუ არ ვცდები ხუთი წლით, გურამ დონაძე. გურამ დონაძე გაასამართლეს ბუტა რობაქიძის საქმეში მტკიცებულებების გაყალბებაზე, მაგრამ ის მტკიცებულებები თუ გაყალბდა მაშინ, კრიმინალური პოლიციის უფროსი, ვინც იყო ამაში ბრალდებული, ვისაც წესით უნდა გაეყალბებინა მტკიცებულებები, იმას შეუფარდეს პირობითი სასჯელი და გურამ დონაძე, პრესცენტრის ხელმძღვანელი გაუშვეს ხუთი წლით. ჟურნალისტს, პრესცენტრის ხელმძღვანელს უშვებენ მტკიცებულებების გაყალბებაზე. რატომ? ძალიან მარტივი მიზეზების გამო – გურამ დონაძის გაკეთებული იყო ფეიჯი „რეზიდენტი სალომე“, სადაც იყო ვიდეოები ივანიშვილის წინააღმდეგ არჩევნების დროს და ივანიშვილმა გასცა პასუხი გურამ დონაძის აქტიურობას არჩევნების პერიოდში“, – განაცხადა მიხეილ სააკაშვილმა.

სასამართლომ ბუტა რობაქიძის საქმეზე ყოფილი მაღალჩინოსნები – დავით იაშვილი, გურამ დონაძე, ზურა მიქაძე, ირაკლი ფირცხალავა და ზაზა ბაქრაძე დამნაშავედ ცნო. გურამ დონაძე დამნაშავედ ცნობილია 332-ე მუხლით და განესაზღვრა 5 წლითა და 3 თვის ვადით თავისუფლების აღკვეთა.