მსოფლიო

გრიგორი კარასინის მტკიცებით, უკრაინამ პროვოკაცია მოაწყო ანტირუსული სანქციების გასამკაცრებლად

რუსეთის საგარეო საქმეთა მინისტრის მოადგილის, გრიგორი კარასინის მტკიცებით, ქერჩის სრუტეში უკრაინამ პროვოკაცია მოაწყო, რომლის მიზანია რუსეთის წინააღმდეგ სანქციების გამკაცრებაა. ამის შესახებ კარასინმა РИА Новости-ის უთხრა.

„გასაგებია მიზნები [პროვოკაციის] - უკრაინის „შეფხიზლება“ სამხედრო მდგომარეობის გამოცხადებით, დასავლეთის ანტირუსული განწყობის მობილიზება, ანტირუსული სანქციების გამკაცრება“, - განაცხადა კარასინმა.

კარასინის თქმით, უკრაინამ და დასავლეთმა აზოვის ზღვა პროვოკაციის მოსაწყობად აირჩიეს.

„სამწუხაროდ, გამართლდა ყველაზე ცუდი შიშები იმასთან დაკავშირებით, რომ კიევმა და დასავლეთმა აზოვის ზღვა აირჩიეს, როგორც რეგიონი, რომელშიც უკრაინის პროვოკაციული აქტივობა საერთაშორისო სკანდალისთვის სწრაფ, საჭირო შედეგის დადებას შეძლებს“, -თქვა კარასინმა.

მისივე შეფასებით, „ამ ფონზე პოროშენკოსთვის, ალბათ, უფრო ადვილია თავისი წინააღმჩევნო კამპანიის განხორციელება“.

გუშინ რუსეთის სამხედრო საზღვაო ფლოტის ხომალდებმა უკრაინის კატარღებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს. ინციდენტის შედეგად, უკრაინის ექვსი მოქალაქეა დაშავებული. უკრაინის პრეზიდენტის წარმომადგენლის ცნობით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული. უკრაინამ რუსეთის მოქმედებები აგრესიად შეაფასა.

მომხდარის გამო უკრაინის ეროვნული უშიშროების საბჭო 60-დღიანი საომარი მდგომარეობის შემოღების ინიციატივით გამოვიდა, რომელსაც უკრაინის პრეზიდენტმა პეტრო პოროშენკომ მხარი დაუჭირა. უჭერს. საომარი მდგომარეობის გამოცხადების საკითხს დღეს უკრაინის უმაღლესი რადა რიგგარეშე სხდომაზე უყრის კენჭს.