კომენტარი

გიორგი მამალაძეს გეგმა „ა“ და გეგმა „ბ“ გააჩნდა, გეგმა „ა“-ს მიხედვით მას პატრიარქი უნდა მოეწამლა - გიორგი თიგინაშვილი

ე.წ „ციანიდის საქმეზე“ ბრალდებულ დეკანოზ მამა გიორგი მამალაძეს გეგმა „ა“ და გეგმაბ „ბ“ გააჩნდა. - ამის შესახებ „ ტვ პირველის“ ეთერში თეოლოგმა გიორგი თიგინაშვილმა განაცხადა.

მისი თქმით, მას ეს კონფიდენციალური ინფორმაცია წყარომ მიაწოდა, რომლის დასახელების უფლებაც არ აქვს, რადგან პირობა აქვს მიცემული.

თიგინაშვილის თქმით, ეს ადამიანები არიან საპატრიარქოს ადმინისტრაციასთან დაახლოებული პირები, იერარქიას, სასულიერო სამღვდელო დასს და აგრეთვე თეოლოგთა ვიწრო წრეს განეკუთვნებიან და ამ საკითხთან პირდაპირი წვდომა აქვთ.

თიგინაშვილის თქმით, „საქმე გვაქვს გამოკვეთილად დანაშაულებრივ ჯგუფთან, რომელიც მიზანმიმართულად იბრძოდა საპატრიარქოში გავლენის სფეროების გაფართოებისთვის“.

„მამა გიორგის ჰქონდა გეგმა „ა“ და გეგმა „ბ“, შესაბამისად ის მოცემულობიდან გამომდინარე, სპონტანურად იმოქმედებდა, თუმცა ეს გეგმები აუცილებლად დასახული და წინასწარ განზრახული, მოტივირებული ექნებოდა. გეგმა „ა“-ს მიხედვით, მას უნდა მოეწამლა მისი უწმინდესობა და უნეტარესობა კათოლიკოს პატრიარქი. საუბარია კვების რაციონსა და მენიუზე. გეგმა „ბ“-ს მიხედვით კი, მას შორენა თეთრუაშვილი უნდა მოეწამლა“,-განაცხადა თეოლოგმა.

რაც შეეხება პროკურატურის მიერ გუშინ გავრცელებულ ვიდეომასალას, გიორგი თიგინაშვილი ამბობს,რომ არსებობს ვიდეოჩანაწერი, სადაც ბევრად უფრო დამამძიმებელი გარემოებებია ასახული.

„სადაც კონკრეტული გეგმის მთელი ნარატივია წარმოდგენილი, თუ როგორ უნდა მოხდეს რამდენიმე ადამიანის სიცოცხლის ხელყოფა, ლიკვიდაცია, მათი უფლებების შეზღუდვა, როგორ უნდა დაიკრძალოს კათოლიკოს პატრიარქი, კომისიაც კი, შეადგინა გიორგი მალაძემ და ეს არის ასახული მასალებში“,-აღნიშნავს წყაროზე დაყრდნობით თეოლოგი.

მისი თქმით, გეგმის სისრულეში მოყვანის შემთხვევაში, ეკლესიის წიაღში ერთგვარი „რევოლუცია მოხდებოდა“.

მისი თქმით, ყოველივე ეს იმ ძალების სასარგებლოდ მოხდებოდა, ვინც დეკანოზი გიორგი მამალაძე შექმნა.

„ტრენდი იცვლებოდა თავიდან ბოლომდე და კურსიც და ორბიტაც. ეს იმ ძალების სასარგებლოდ მოხდებოდა, ვინც დეკანოზი გიორგი მამალძე შექმნა, ვინც მისი პიროვნების აღზევებით იყო დაკავებული, ვინც რეკორდული სისწრაფით განავლებინა მას თანამდებობრივი საფეხურები, ასეთ ადრეულ ასაკში. იგი სულ რაღაც 30 წლის არის და ორჯვრიანი მიტროსანი დეკანოზია, ამავე დროს საფინანსო განყოფილების თანათავმჯდომარე. მანამდე კი, ამბობენ რომ ბათუმისა და ლაზეთის ეპარქიაში ეკავა მაღალი თანამდებობები“,-განაცხადა თეოლოგმა.

მონიკა დავლიანიძე