კომენტარი

გია ვოლსკი პრეზიდენტის შესაძლო გადადგომაზე - ქვეყნისათვის ნამდვილად დამაზიანებელი იქნება, თუკი ეს მოვლენები ასე განვითარდა

პარლამენტის ვიცე-სპიკერი, საპარლამენტო უმრავლესობის ერთ-ერთი ლიდერი, გია ვოლსკი მოწოდებად აფასებს პარლამენტის ყოფილი თავმჯდომარის, დავით უსუფაშვილის პროგნოზს პრეზიდენტის შესაძლო ვადამდელ გადადგომასთან დაკავშირებით.

,,მოწოდებასავით გაჟღერდა. დანარჩენი დათოს ჰკითხეთ, მაგრამ მე ასე გავიგე. მე ვფიქრობ, რომ უსაფუძვლოა, არადროულია არაკონსტრუქციულია და ქვეყნისათვის ნამდვილად დამაზიანებელი იქნება, თუკი ეს მოვლენები ასე განვითარდა.

ეს არის რაღაც ახალი დაძაბულობის, ახალი დაპირისპირებების სცენარისკენ მოწოდება და არა საექსპერტო ანალიზი’’, - განუცხადა ჟურნალისტებს გია ვოლსკიმ.

რაც შეეხება კითხვას, თუ ვის უნდა აწყობდეს მსგავსი სცენარი, ვიცე-სპიკერი ფიქრობს, რომ ეს შესაძლოა, არარეიტინგულ პოლიტიკური ძალების ინტერესის საგანი იყოს.

,,იმ პარტიებს და იმ პოლიტიკურ ძალებს, რომლებსაც პერსპექტივა არჩევნებში გამარჯვების არ გააჩნიათ, იმათთვის შეიძლება ასეთი სცენარი იყოს მისაღები’’, - აცხადებს გია ვოლსკი.

ნინო ექვთიმიშვილი