მსოფლიო

გერმანიის საპარლამენტო არჩევნებში ანგელა მერკელის ქრისტიან-დემოკრატიულმა კავშირმა გაიმარჯვა

გერმანიის საპარლამენტო არჩევნებში ქვეყნის მოქმედი კანცლერის, ანგელა მერკელის პარტიამ გაიმარჯვა. როიტერსის ინფორმაციით, ქრისტიან-დემოკრატიულმა კავშირმა ამომრჩეველთა ხმების 33% მიიღო, რაც 2013 წელთან შედარებით 8.5%-ით ჩამორჩება და არის ყველაზე დაბალი შედეგი 1949 წლიდან.

მმართველი გუნდის შემდეგ ყველაზე მეტი მანდატი სოციალ-დემოკრატებმა მიიღეს, მათ ამომრჩეველთა 20.5%-მა დაუჭირა მხარი. ბუნდესტაგში ასევე მოხვდა პარტია „ალტერნატივა გერმანიისთვის“, რომელიც გამოდის საიმიგრაციო პოლიტიკის გამკაცრების მოთხოვნით. მან არჩევნებზე ხმათა 12.6% მიიღო. ნახევარ საუკუნეზე მეტია, რაც გერმანულ პარლამენტში არ იყო წარმოდგენილი რადიკალ-მემარჯვენე პარტია.

პარლამენტში ასევე მოხვდნენ თავისუფალი დემოკრატები, მემარცხენეები და მწვანეები.

მერკელმა უკვე გამოაცხადა, რომ მზადაა კოალიციური მთავრობის ფორმირებისთვის, რაზეც სოციალ-დემოკრატებმა უარი თქვეს. მარტინ შულცის პარტია ოპოზიციაში წასვლას გეგმავს.

ანა მებურიშვილი