კომენტარი

განცხადებები,რომ ლარის კურსზე წინასაარჩევნოდ დახარჯულმა თანხებმა იქონია გავლენა, ჭიქა წყალში ქარიშხლის ატეხვას ჰგავს - დავით ჭიჭინაძე

საპარლამენტო უმრავლესობის წვერის, დავით ჭიჭინაძის თქმით, ეროვნულმა ბანკმა ლარის გაუფასურების სავარაუდო მიზეზებთან დაკავშირებით საზოგადოებისთვის განმარტება უნდა გააკეთოს.

როგორც დავით ჭიჭინაძემ პრესკონფერენციაზე აღნიშნა, ეროვნული ბანკი უნდა აანალიზებდეს თუ რა იწვევს ეროვნული ვალუტის დევალვაციას და შესაბამის ინფორმაციას აწვდიდეს მოსახლეობას.

„ძალიან უცნაური განცხადება მოვისმინეთ ქვეყნის პირველი ბანკირისგან, რომ ის კომენტარებს არ გააკეთებდა ამ საკითხზე. ვთვლი, რომ ზოგადად, ეროვნული ბანკის მხრიდან საჭიროა განცხადების გაკეთება, საზოგადოებისთვის ინფორმაციის მიწოდება, რატომ მყარდება ან უფასურდება ეროვნული ვალუტა. არჩევნების მეორე დღეს ეროვნული ვალუტის გაუფასურება არალოგიკურია. არჩევნები იყო შაბათს. ეროვნული ვალუტის გაუფასურება დაიწყო კვირას. კვირას არც ეკონომიკური აქტივობაა არც არაფერი, ესეც უცნაურია. ამიტომ კიდევ ერთხელ ვამბობ- საჭიროა განმარტება ეროვნული ბანკის მხრიდან.

განცხადებები, რომ ლარის კურსზე წინასაარჩევნოდ დახარჯულმა თანხებმა იქონია გავლენა, ჭიქა წყალში ქარიშხლის ატეხვას უფრო ჰგავს, ვიდრე რეალობას. არც ისეთი დიდი თანხა დაიხარჯა საარჩევნოდ, რომ ეს ლარის კურსის ცვალებადობაზე ასახულიყო, იქიდან გამომდინარე რა ფულადი მასა ტრიალებს ქვეყნაში ძალიან მცირეა წინასაარჩევნოდ დახარჯული თანხა. მაშინ რას ნიშნავს, რომ ხელფასის გაცემის დღეები როცაა და ვიცით, რომ საჯარო უწყებებში ხელფასი პრაქტიკულად ერთი და იმავე დღეებში გაიცემა ლარის კურსი უნდა ეცემოდეს და მერე მყარდებოდეს?“, - განაცხადა დავით ჭიჭინაძემ.

მონიკა დავლიანიძე