კომენტარი

განცხადება იმის თაობაზე, რომ 20 ივნისს თავებს დაითვლიან, ეს შეიძლება თქვას უთავო ადამიანმა - რომან გოცირიძე

“20 ივნისის გახსენება ან რაიმე ფორმით 20 ივნისის აქციის კომენტირება, „ქართული ოცნებისთვის“ მძიმედ გადასატანია და ასეთ სულელურ კომენტარებს ამიტომ აკეთებენ“,- ასე გამოეხმაურა საქართველოს პარლამენტის ფრაქცია „ნაციონალური მოძრაობის“ თავმჯდომარე, რომან გოცირიძის უმრავლესობის წევრის, ირაკლი კობახიძის განცხადებას, სადაც აღნიშნა, რომ 20 ივნისს დაგეგმილ აქციაზე 200 „ნაციონალი“ იდგება და საზოგადოებას შეეძლება, ყველა სათითაოდ დათვალოს.

„განცხადება იმის თაობაზე, რომ 20 ივნისს თავებს დაითვლიან, ეს შეიძლება თქვას უთავო ადამიანმა. 20 ივნისი არის „ქართული ოცნების“ ხელისუფლების ძალადობის, ანტისახელმწიფოებრიობისა და უსამართლობის დემონსტრირება. მათთვის ეს არის კოშმარი. ამიტომ, 20 ივნისის გახსენება ან რაიმე ფორმით 20 ივნისის აქციის კომენტირება, „ქართული ოცნებისთვის“ მძიმედ გადასატანია და ასეთ სულელურ კომენტარებს ამიტომ აკეთებენ“, – განაცხადა გოცირიძემ.

ცნობისთვის, პარლამენტის ყოფილმა თავმჯდომარემ, საპარლამენტო უმრავლესობის წევრმა ირაკლი კობახიძემ გუშინ ჟურნალისტებთან 20 ივნისს დაგეგმილ აქციასთან დაკავშირებით განაცხადა, რომ აქციაზე მხოლოდ პარტიული აქტივი იქნება.

„200 „ნაციონალის" შეკრება არ არის პრობლემა არც პოლიტიკური, არც პანდემიის კუთხით. გარკვეულ სოციალურ დისტანციას ალბათ, დაიცავენ, თავებიც შეგვიძლია, დავთვალოთ , - განაცხადა კობახიძემ.