კომენტარი

განსაკუთრებული ყურადღების ქვეშ იქნება ნიუსრუმი, ახალი ამბები და რასაკვირველია სხვა გადაცემებიც - ვასილ მაღლაფერიძე

საზოგადოებრივი მაუწყებლის ახალი გენერალური დირექტორი, ვასილ მაღლაფერიძე სამეურვეო საბჭოს წევრებს ნდობისთვის მადლობას უხდის და აღნიშნავს, რომ იგი დაკისრებულ პასუხისმგებლობას ნამდვილად გრძნობს.

როგორც მაღლაფერიძემ დირექტორად არჩევის შემდეგ პირველ არხს სატელეფონო ჩართვის დროს განუცხადა, უკვე ორშაბათიდან დაიწყებს დაძაბულ მუშაობას.

„პირველი გეგმა რაც არის, საზოგადოებრივი მაუწყებელმა უნდა დაიწყოს ბრძოლა, რომ გავხდეთ ერთ-ერთი ძირითადი მოთამაშე მედია ბაზარზე. ჩვენ ვიწყებთ ორშაბათიდან. უნდა ავღწეროთ და ინვენტარიზაცია ჩავატაროთ, თუ რა შესაძლებლობები გაგვაჩნია და დავიწყებთ გძელვადიანი გეგმის გაკეთებას, სადაც ზუსტად იქნება გაწერილი ყველა აქტივობა.უნდა დავსახოთ უმოკლესი გზა, თუ როგორ შევძლოთ, რომ ბაზრის ძირითადი მოთამაშეები გავხდეთ. რასაკვირველია, განსაკუთრებული ყურადღების ქვეშ იქნება ნიუსრუმი, ახალი ამბები და რასაკვირველია სხვა გადაცემებიც“,-განაცხადა საზმაუს ახალმა დირექტორმა.

რაც შეეხება საკადრო ცვლილებებს, ვასილ მაღლაფერიძე აღნიშნავს, რომ საზოგადოებრივი მაუწყებელი გამოირჩევა მაღალი ინტელექტუალური საკადრო რესურსით.

„უბრალოდ მას სჭირდება სწორად ორგანიზება. ჩემი ძირითადი საყრდენი, რასაკვირველია იქნება ადგილობრივი კადრები. რაღაც გარკვეული ცვლილებები შეიძლება მოხდეს. ეს ბუნებრივი ამბავია. საზოგადოებრივი მაუწყებელი ყოველთვის გახსნილი იქნება და უნდა იყოს გახსნილი იმ კადრებისთვის, რომელიც ჩვენ დაგვჭირდება. მაგრამ ჩვენი საყრდენი არის არსებული მდგომარეობა“,-აღნიშნა მაღლაფერიძემ.

სკეპტიკოსებზე საუბრისას ვასილ მაღლაფერიძემ განაცხადა, რომ სკეპტიკოსებს იგი საქმით გასცემს პასუხს.

„მხოლოდ ჩვენი თითოეული ნაბიჯი იქნება ამ სკეპტიკოსების პასუხი. არ ვაპირებ სკეპტიკოსებს მჭევრმეტყველებაში გავეჯიბრო“,-აღნიშნა საზოგადოებრვიი მაუწყებლის გენერალურმა დირექტორმა.

ვასილ მაღლაფერიძე 2014 წლიდან-2016 წლის აგვისტომდე ტელეკომპანია GDS -ზე , გადაცემა 2030-ის გენერალური პროდიუსერი იყო.
2012 წელს იგი ტელეკომპანია მეცხრე არხის დირექტორის მოადგილეს თანამდებობას იკავებდა;
2010-2012 წლებში ელექტრონული ჟურნალი „კალმასობა“-ს მთავარი რედაქტორი იყო;
2008-2009 წლებში ვასილ მაღლაფერიძე სახალხო დამცველის აპარატში მუშაობდა;
2005-2008 წლებში მცხეთა-მთიანეთში სახელმწიფო რწმუნებული, გუბერნატორის თანამდებობას იკავებდა;
2004-2005 წლებში კი, საქართველოს პარლამენტის წევრი იყო;
იყო გაზეთ „კავკასიონის“ თანადამფუძნებელი.

მონიკა დავლიანიძე