კომენტარი

გამიმყარდა ეჭვები იმის თაობაზე, რომ დეკანოზ გიორგი მამალაძეს საერთოდ ციანიდი არც ჰქონდა ნაყიდი - მეუფე დიმიტრი

მე გამიმყარდა საერთოდ ეჭვები იმის თაობაზე, რომ დეკანოზ გიორგი მამალაძეს საერთოდ ციანიდი არც ჰქონდა ნაყიდი, - განაცხადა ბათუმისა და ლაზეთის მიტროპოლიტი, მეუფე დიმიტრიმ დღეს გამართულ პრესკონფერენციაზე.

მისი მოსაზრებით, პროკურატურას, რომ დეკანოზის მიერ ციანიდის შეძენის დამადასტურებელი ფაქტები ჰქონოდა, აჩვენებდა საზოგადეობას.

,,მათ, რომ ეს ფაქტები ჰქონოდა, ამას არ დამალავდნენ. მე მათ არაერთხელ შევახსენე, რომ ეს ფაქტები საზოგადოებას უნდა აჩვენოთ, იმიტომ, რომ უამრავი დეტალი გაქვთ გადაღებული. ათეულობით საათის ჩანაწერი არის ირაკლი მამალაძისგან, ჯერ თავიდან მოყვარულის დონეზე და შემდეგ უკვე პროფესიონალურ დონეზე, იმიტომ, რომ შემდეგ უკევ პროკურატურა ჩაერთო. ფაქტობრივად, ეს ფაქტები, ვერ წარმოაჩინეს. სასამართლომ მიიღო გადაწყვეტილება ამ მეტად მნიშვნელოვანი ფაქტის გარეშე“, - განაცხადა მეუფე დიმიტრიმ.

ამასთან, მეუფე გამორიცხავს, რომ დეკანოზი გიორგი მამალაძე პატრიარქის ან შორენა თეთრუაშვილის ლიკვიდაციას გეგმავდა.

„მე ვერ ვიტყვი, რომ პატრიარქის ლიკვიდაცია იგეგმებოდა, რადგან მამალაძისა და პატრიარქის ურთიერთობის მომსწრე არაერთხელ ვყოფილვარ. ვხედავდი, რომ მას უსაზღვროდ უყვარდა პატრიარქი. გამოვრიცხავ, რომ პატრიარქის მკვლელობა იგეგმებოდა. ასევე გამოვრიცხავ შორენა თეთრუაშვილის ლიკვიდაციას, რადგან ჩემთვის აბსოლუტურად აზრი აქვს დაკარგული თუ რატომ უნდა მომხდარიყო შორენა თეთრუაშვილის ლიკვიდაცია. თუმცა, აქ უკვე მძიმე დღეში ვარ, რადგან ფაქტია, რომ ეს ადამიანი ეძებდა ციანიდს და ვიღაცაზე საუბრობს“, - განაცხადა მეუფე დიმიტრიმ დღევანდელ პრესკონფერენციაზე.

ნინო ექვთიმიშვილი