მსოფლიო

გაერო ტყუილების სახლია - ბენიამინ ნეთანიაჰუ

„ტყუილების სახლი“ , - ასე უწოდა ისრაელის პრემიერ-მინისტრმა ბენიამინ ნეთანიაჰუმ გაეროს დღეს დაგეგმილი გენერალური ასამბლეის სხდომის წინ, სადაც იერუსალიმის საკითხზე უნდა იმსჯელონ. ორგანიზაციის წევრები კენჭს უყრიან რეზოლუციას, რომელიც აკრიტიკებს აშშ-ის მიერ იერუსალიმის ისრაელის დედაქალაქად აღიარებას.

„ისრაელის სახელწმიფო ამ კენჭისყრას მის დაწყებამდე უარყოფს“, - თქვა ისრაელის პრემიერ-მინისტრმა.

ნეთანიაჰუმ მადლობა გადაუხადა დონალდ ტრამპსა და გაეროში აშშ-ის მუდმივ წარმომადგენელ ნიკი ჰეილის „მათი მამაცი და უკომპრომისო პოზიციისთვის“. მან აღნიშნა, რომ სხვა ქვეყნები შეცვლიან შეხედულებას იერუსალიმის შესახებ და გაიმეორებენ აშშ-ის მაგალითს.

„გაერთიანებული ერების ორგანიზაციის კედლებს გარეთ ბევრი ქვეყნის დამოკიდებულება ისრაელისადმი ყველა კონტინენტზე იცვლება და ბოლოს შემოაღწევს გაეროში -ტყუილების სახლში“, -აღნიშნა ისრაელის პრემიერ-მინისტრმა.

მან დაამატა, რომ იერუსალიმი ისრაელის დედაქალაქად დარჩება, აღიარებს თუ არა ამას გაერო.

აშშ-ის პრეზიდენტმა დონალდ ტრამპმა იერუსალიმი ისრაელის დედაქალაქად 6 დეკემბერს აღიარა.

ანა მებურიშვილი