კომენტარი

ფიქრია ჩიხრაძე საკონსტიტუციო ცვლილებების საკითხზე პლებისციტის ჩატარების ინიციატივას საინტერესო იდეად მიიჩნევს

პრეზიდენტის მრჩეველი პოლიტიკურ საკითხებში ფიქრია ჩიხრაძე საკონსტიტუციო ცვლილებების საკითხზე პლებისციტის ჩატარების ინიციატივას საინტერესო იდეად მიიჩნევს.

მისი თქმით, საკონსტიტუციო ცვლილებების პროცესი და კომისიის მუშაობა არ წავიდა თანხმობის გზით არც პოლიტიკურ აქტორებთან და არც საზოგადოებასთან, ამიტომ ბუნებრივად გაჩნდა ასეთი მოსაზრებები.

”გამომდინარე იქიდან, რომ საკონსტიტუციო ცვლილებების პროცესი და კომისიის მუშაობა არ წავიდა თანხმობის გზით არც პოლიტიკურ აქტორებთან და არც საზოგადოებასთან, ბუნებრივად გაჩნდა ასეთი მოსაზრებები. იგივე იმ შეხვედრებზე, რომელსაც პრეზიდენტი მართავს საზოგადოებასთან, ძალიან ხშირად ისმის ამ მიმართულებით მოსაზრებები, პრეზიდენტს მიმართავენ. პოლიტიკურ პარტიებში, ექსპერტულ წრეებში გაჩნდა ასეთი მოსაზრებეები.

რა თქმა უნდა, პრობლემურია, როდესაც კომისიამ მუშაობა დაამთავრა პრაქტიკულად ნულოვანი კონსენსუსით. კონსტიტუცია რომ აუცილებლად თანხმობის დოკუმენტი უნდა იყოს, ამაზე ორი აზრი არ არსებობს და ამაზე ვერავინ იკამათებს არგუმენტებით, აქედან გამომდინარე, იდეა თავისთავად საინტერესოა. ჩვენ კიდევ დავაკვირდებით, კიდევ გვექნება შეხვედრები, როგორ განვითარდება ეს იდეა და რამდენად იქნება კონსენსუსი ამ საკითხთან დაკავშირებით”, - განაცხადა ფიქრია ჩიხრაძემ.

შეგახსენებთ, ”ევროპული საქართველო” საკონსტიტუციო ცვლილებების საკითხზე პლებისციტის ჩატარების ინიციატივით გამოდის.

როგორც პარტიის ერთ-ერთმა ლიდერმა დავით ბაქრაძემ გუშინ განაცხადა, ”ევროპული საქართველოს” ინიციატივა შეეხება საკონსტიტუციო ცვლილებების ორ მთავარ საკითხს - პრეზიდენტის პირდაპირი არჩევნების თემას და საპარლამენტო არჩევნების სისტემას.

ნინო ექვთიმიშვილი