კომენტარი

ფინანსთა სამინისტროში რაიმე მასშტაბურ საკადრო ცვლილებებზე საუბარი არ იქნება - მამუკა ბახტაძე

ფინანსთა მინისტრობის კანდიდატის, მამუკა ბახტაძის განცხადებით, ფინანსთა სამინისტრო იმდენად წარმატებული უწყებაა, რომ ამ ეტაპზე მასშტაბური საკადრო ცვლილება არ განხორციელდება.

ამის შესახებ ბახტაძემ მთავრობის ადმინისტრაციაში დასრულებული შეხვედრის შემდეგ მედიას განუცხადა.

მისი თქმით, მისი კანდიდატურის დამტკიცების შემთხვევაში, მას ქართულ ბიზნესთან მჭიდრო კომუნიკაცია ექნება.

მისივე თქმით, არც ერთი საგადასახადო ინიციატივა, თუ რეფორმა ქართულ ბიზნესთან კონსულტაციის გარეშე გატარებული არ იქნება.

„სრული პასუხისმგებლობით მინდა განვაცხადო, რომ ძალიან აქტიური კომუნიკაცია გვექნება ქართულ ბიზნესთან. განსაკუთრებულ პრიორიტეტს მივანიჭებთ საშუალო და მცირე ბიზნესთან ურთიერთობაზე. არც ერთი რეფორმა, ან საგადასახადო ინიციატივა არ იქნება გატარებული ისე, რომ არ მივიღოთ კონსულტაცია ქართული ბიზნესისგან , ჩვენი სხვა პარტინორებისგან.

აქვე მინდა ავღნიშნო, რომ ძალიან დიდი პრიორიტეტი მიენიჭება მართვის ავტორიზირებული სისტემების დანერგვას სამინისტროში. ამ კუთხით ძალიან დიდი ნაბიჯებია გადადგმული უწყებაში და აუცილებლად ეს მიმართულება გაგრძელდება.

მე ვფიქრობ, რომ ფინანსთა სამინისტრო არის წარმატებული უწყება, შესაბამისად, ამ ეტაპზე რაიმე მასშტაბურ საკადრო ცვლილებებზე საუბარი ნამდვილად არ იქნება“,- განმარტა მინისტრობის კანდიდატმა.

საქართველოს რკინიგზაში მისი მუშაობის პერიოდისა და მიღწეულ შედეგებზე საუბრისას, ბახტაძემ განაცხადა, რომ „ყველაზე კარგი ინდიკატრი თუ როგორ ფუნქციონირებს რკინიგზა, არის მისი ფასიანი ქაღალდების ტრენდი ბირჟაზე“.

„როგორც მოგეხსენებათ, ჩვენი ბონდები კვოტირებს ლონდონის ბირჟაზე და ის არის საუკეთესო პოსტსაბჭოთა სივრცეში. საქართველოს რკინიგზაში მოქმედებს კორპორატიული მართვა, არსებობს შესაბამისი ბორდები, რომელიც უზრუნველყოფს კომპანიის გამჭირვალე კორპორატიულ მმართველობას“,- აღნიშნა მამუკა ბახტაძემ.

მონიკა დავლიანიძე