კომენტარი

ფინანსთა მინისტრის მოადგილე ,,ომეგა ჯგუფის“ ბრალდებებს პასუხობს

ერთი შემიძლია ,,ომეგასთან“ დაკავშირებით ვთქვა, გადაიხადოს, რაც არის გადასახდელი, თუნდაც მიმდინარე აქციზური მარკების ღირებულება და შესაბამისად, მოხდება შესაბამისი რაოდენობის აქციზური მარკების გაცემა, - განაცხადა ფინანსთა მინისტრის მოადგილემ, გიორგი კაკაურიძემ ,,ომეგა ჯგუფის“ მიერ ფინანსთა სამინისტროს შემოსავლების სამსახურისა და მისი კონტრაქტორი კომპანია „სიქფა სიქურითი სოლუშენს ჯორჯია“-ს წინააღმდეგ სასამართლოში სარჩელის შეტანის კომენტირებისას.

,,კონკრეტული ხელშეკრულების დეტალებში ნამდვილად ვერ შევალ, არ მაქვს სრულყოფილი ინფორმაცია, თუმცა ერთი შემიძლია ,,ომეგასთან“ დაკავშირებით ვთქვა, გადაიხადოს, რაც არის გადასახდელი, თუნდაც მიმდინარე აქციზური მარკების ღირებულება და შესაბამისად, მოხდება შესაბამისი რაოდენობის აქციზური მარკების გაცემა.

რამდენჯერაც გადაიხდის, იმდენჯერ მოხდება. თანხას არ იხდის კომპანია და შესაბამისად ვერ იღებს მარკებს“, - აცხადებს გიორგი კაკაურიძე.

თავის მხრივ, ,,ომეგა ჯგუფში“ აცხადებენ, რომ კომპანიას შეკვეთით გათვალისწინებული აქციზური მარკების ნომინალის გადასახდელად საჭირო ინვოისს არ აწვდიან.

აღნიშნულთან დაკავშირებით დღეს ოჯთ-ს გაჩერებულ საწარმოში განცხადება ,,ომეგა ჯგუფის“ გენერალურმა მენეჯერმა ლევან აღდგომელაშვილმა გააკეთა.

აღნიშნულის გათვალისწინებით, ,,ომეგა ჯგუფს“ საქართველოს ფინანსთა სამინისტროს შემოსავლების სამსახურისა და მისი კონტრაქტორი კომპანია „სიქფა სიქურითი სოლუშენს ჯორჯია“-ს წინააღმდეგ სასამართლოში სარჩელი შეაქვს.