კომენტარი

ფაქტია, რომ ადამიანი დაკავებულია იმის გამო, რომ მან შეიძინა ციანიდი და მიემგზავრებოდა გერმანიაში - გია ვოლსკი

პარლამენტის ვიცე-სპიკერის, გია ვოლკის განცხადებით, სანამ საქმე ბოლომდე არ იქნება მიყვანილი, საუბარი იმაზე, თუ ვინ იყო ბოროტმოქმედის სამიზნე, უადგილოა.

როგორც ვოლსკიმ დეკანოზ გიორგი მამალაძის დაკავებასა და საქმეზე პროკურატურის მიერ გაკეთებული განცხადების კომენტირებისას განაცხადა, პროკურატურის მიერ გაკეთებული განცხადება ზუსტად ასახავს საქმის მიმდინარეობას.

„სანამ საქმე ბოლომდე არ იქნება მიყვანილი, ნებისმიერი საუბარი იმის შესახებ, ბოროტმოქმედების სამიზნე სასულიერო პირია თუ სამოქალაქო პირი, ზედმეტია. ეს თემა არის ძიების პროცესში. ფაქტია, რომ ადამიანი დაკავებულია იმის გამო, რომ მან შეიძინა ციანიდი და მიემგზავრებოდა გერმანიაში, სადაც პატრიარქს ოპერაცია უტარდებოდა. ეს არის მოცემულობა. გამოძიება დაადგენს, ვინ იყო შესაძლო მოწამვლის მსხვერპლი“, - განუცხადა ჟურნალისტებს გია ვოლსკიმ.

საპარლამენტო უმრავლესობის წევრმა ასევე აღნიშნა, რომ პრემიერ-მინისტრმა პროფესიონალურად იმოქმედა, როცა გერმანიაში პატრიარქთან სახელმწიფო დაცვა მიავლინა, რადგან “ნებისმიერ შემთხვევაში, როდესაც საუბარია კონკრეტულ პირებზე ან ინსტიტუტზე, ვიდრე გაირკვევა, თუ რა ხდება, პირველი პირი ყოველმხრივ დაცული უნდა იყოს“.

მონიკა დვალიანიძე