მსოფლიო

ევროპის საბჭოში პრეზიდენტის პედრო აგრამუნტის გადადგომას ითხოვენ

ევროპის საბჭოს დეპუტატების ნაწილი, საბჭოს პრეზიდენტი პედრო აგრამუნტის გადადგომას ითხოვს.

საბჭოს ასამბლეის საგაზაფხულო სესია ხმაურით გაიხსნა.

დეპუტატებმა სიტყვით გამოსვლის დროს აგრამუნტი იმაში დაადანაშაულეს, რომ ის რუსეთის დელეგაციასთან ერთად სირიაში ჩავიდა.

პედრო აგრამუნტმა განცხადებების შემდეგ სხდომაზე შესვენება გამოაცხადა, დარბაზი დატოვა და იქ აღარ დაბრუნებულა.

თუმცა, სხდომის დაწყებისას აგრამუნტმა დეპუტატებს სიტყვით მიმართა.

”მინდა განცხადება სირიაში ჩემი ვიზიტით დავიწყო. კარგად მესმის თქვენი შეშფოთება, მით უმეტეს თუ გავითვალისწინებთ ზოგიერთი მედიასაშუალების მიერ ამ ვიზიტის გაშუქებას. ეს ვიზიტი შეცდომა იყო და მე ამას გულწრფელად ვაღიარებ. ბოდიშს ვიხდი ამ შეცდომისთვის. პირველი შეცდომა იყო ის, რომ სათანადოდ ვერ შევაფასე ასამბლეის წევრების მხრიდან მოსალოდნელი რეაქცია. ვფიქრობდი, ეს ვიზიტი სირიის კონფლიქტის მოგვარების საკითხში წვლილის შეტანის საშუალებას მომცემდა. მეორე შეცდომა იყო ის, რომ პირადპირ არ ჩავაყენე საქმის კურსში პოლიტიკური ლიდერები. მესამე შეცდომა ჩემგან დამოუკიდებელია, რადგან ვერ გავაკონტროლებდი რუსულ მედიასაშუალებებს”, - განაცხადა აგრამუნტმა.

მონიკა დავლიანიძე