კომენტარი

ევროპარლამენტში ჩვენს მიმართ მხოლოდ ერთი კითხვა იყო - სოზარ სუბარი

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის სოზარ სუბარის განცხადებით, საქართველოსთან მიმართებაში აფგან მუხთარლის საქმეზე ევროპარლამენტის წევრებს მხოლოდ ერთი კითხვა აქვთ, თუ როდის დაამთავრებს ქართული მხარე საქმის გამოძიებას.

მინისტრმა აღნიშნა, რომ საქართველო გამოძიებას ყოველგვარი მოწოდებების გარეშეც აწარმოებს.

ამის შესახებ სოზარ სუბარმა, მთავრობის დღევანდელი სხდომის დასრულების შემდეგ განაცხადა.

„მუხთარლის მიმართ თუ დევნა იყო მეზობელ ქვეყანაში, ან თუ ის რაიმე საფრთხეს გრძნობდა, მას შეეძლო მოემართა კონკრეტულად ჩვენი სამინისტროსთვის, რომ მიეღო თავშესაფარი. ან საქართველოში, თბილისში არის ამიერკავკასიის ოფისი გაეროს ლტოლვილთა უმაღლესი კომისარიატის და მიემართა მათთვის.

ევროპარლამენტში იყო განხილვა. ევროპარლამენტში იყო სხვა თემის განხილვა, რომელიც შეეხება აზერბაიჯანს. აფგან მუხთარლის საქმე იყო ერთი მცირე ნაწილი იმ დიდი თემის და საქართველოსთან მიმართებაში არის ერთადერთი კითხვა, რომ როდის დაამთავრებს საქართველო გამოძიებას. ანუ ამ შემთხვევაში ეს არის ჩვენი პასუხისმგებლობა, რასაც ჩვენ ვაკეთებთ ყოველგვარი მოწოდებების გარეშე“,-აღნიშნა მინისტრმა.

მონიკა დავლიანიძე