მსოფლიო

ევროკავშირი ადამიანის უფლებების დაცვისა და თავისუფლებების სიმბოლო აღარ არის - თურქეთის პრეზიდენტი

თურქეთის პრეზიდენტი რეჯეპ ტაიპ ერდოღანი მიიჩნევს, რომ ევროკავშირი ადამიანის უფლებების დაცვისა და თავისუფლებების სიმბოლო აღარ არის.

ამის შესახებ ერდოღანმა ანკარაში განაცხადა, სადაც თურქეთის მედიცინის დღესადმი მიძღვნილ ღონისძიებას დაესწრო.

„ნიდერლანდებს სრებრენიცაში მოწყობილი ჟლეტვიდან ვიცნობთ. მათ საკუთარი არსი გამოავლინეს, როდესაც 8 ათასი ბოსნიელი დახოცეს“,-განაცხადა თურქეთის პრეზიდენტმა.

მისი თქმით, „თუკი თურქეთის ზრდა და განვითარება ვინმესთვის იმედის მომცემია, დარწმუნებულები იყავით, რომ ზოგოერთისთვის, მათ შორის ნიდერლანდებისა და გერმანიისთვის ის კოშმარად იქცა“.

თურქეთის პრეზიდენტმა აღნიშნა, რომ ის ვინც ძველ თურქეთს არის შეჩვეული, მის დღევანდელ პოზიციას ვერ ეგუება.

„ანკარას ევროპული ქვეყნებისთვის არაერთხელ უთქვამს, რომ მათ ფაშისტებისა და რასისტების ნათქვამზე არ უნდა იარონ, რადგან ეს მათ მნიშვნელოვან ზარალს მოუტანს. სამწუხაროდ, ბოლო დროს განვითარებულმა მოვლენებმა გვაჩვენა, რომ ამაში შევცდით და ჩვენი შიში გამართლდა. ნიდერლანდების ხელისუფლების ქმედება ჩვენი მინისტრების მიმართ შეიძლება შევაფასოთ როგორც თურქეთისადმი, თურქი ხალხისადმი უპატივცემულობა, ასევე საერთაშორისო სამართლისა და დიპლომატიისადმი უპატივცემულობა“,-ხაზი გაუსვა ერდოღანმა.

მონიკა დავლიანიძე