კომენტარი

ე.წ ციანიდის საქმეზე დაიკითხა ყველა ის პირი, ვისაც მტკიცებულებების შენახვასთან შეხება ქონდათ - დავით გუმბერიძე

პროკურორ დავით გუმბერიძის განცხადებით, ამ ეტაპზე დაკითხულია ყველა ის პირი, ვისაც ე.წ ციანიდის საქმის მტკიცებულებების შენახვასთან შეხება ქონდათ.

ამის შესახებ გუმბერიძემ ჟურნალისტებს საქალაქო სასამართლოში განუცხადა, სადაც საქმის სამ ადვოკატს მაგისტრი მოსამართლის თანდასწრებით დაკითხავენ.

ადვოკატების დაკითხვას, სწორედ დავით გუმბერიძე განახორცილებს.

„პირები, ვისაც შეხება ქონდათ საქმესთან დაკავშირებით, მტკიცებულებების შენახვის კუთხით და ასევე მხარს უჭერდნენ სახელმწიფო ბრალდებას ჩვენს მიერ სრულად არის დაკითხული. კიდევ ერთხელ გავნმეორდები, რომ პროკურატურის მხრიდან დაკითხულია ყველა ის პირი, ვისაც შეხება ქონდა ამ საქმესთან დაკავშირებით“,-აღნიშნა პროკურორმა.

ჟურნალისტების კითხვაზე, დაკითხულია თუ არა კონკრეტულად, საქმის პროკურორები ჯარჯი წიკლაური და ზვიად გუბელაძე, დავით გუმბერიძე პასუხობს, რომ „რაც შეეხება კონკრეტულ პიროვნებებს, თავს შევიკავებ პასუხის გაცემისგან“.

„თქვენ მთხოვთ იმ პირების დასახელებას, იმ მოწმეების და მტკიცებულებების დასახელებას, რაც ამ ეტაპზე საჭიროებას არ წარმოადგენს“,- განმარტა პროკურორმა.

მონიკა დავლიანიძე