მსოფლიო

ე.წ. „ყვითელი ჟილეტების“ პროტესტმა შედეგი გამოიღო - საფრანგეთის ხელისუფლება საწვავის ფასის გაზრდას აღარ აპირებს

საფრანგეთის მთავრობა საწვავზე ფასების ზრდის გადაწყვეტილების შეჩერებას აპირებს, - ამის შესახებ სამთავრობო წყარომ სააგენტო Reuters-ს აუწყა.

წყაროს ცნობით, პრემიერ-მინისტრი ედუარდ ფილიპი ამის შესახებ დღეს განაცხადებს.

მთავრობამ საწვავზე ფასების გაზრდის გადაწყვეტილება გარემოს დაბინძურებასთან ბრძოლის ფარგლებში მიიღო.

ამ გადაწყვეტილებამ საფრანგეთში მასშტაბური საპროტესტო ტალღა გამოიწვია. ე.წ. „ყვითელი ჟილეტების“ დემონსტრაციები 17 ნოემბრიდან დაიწყო. გამოსვლები გადაიზარდა საფრანგეთის პრეზიდენტის, ემანუელ მაკრონის წინააღმდეგ მიმართულ ამბოხებად. საზოგადოების ნაწილი მაკრონს საფრანგეთის მდიდარი ფენის სასარგებლოდ მიმართულ პოლიტიკაში ადანაშაულებს.

საპროტესტო გამოსვლების დროს სამი ადამიანი დაიღუპა. წინა შაბათს პარიზში პოლიციასა და საპროტესტო აქციის მონაწილეებს შორის შეტაკება მოხდა. პოლიციამ დემონსტრანტების წინააღმდეგ ცრემლსადენი გაზი და წყლის ჭავლი გამოიყენა. სამართალდამცველებმა პარიზის ცენტრალური ნაწილიც გადაკეტეს.

საპროტესტო მოძრაობას „ყვითელი ჟილეტები“ დაარქვეს, რადგან დემონსტრანტებს ყვითელი ფერის ტანსაცმელი აცვიათ. საფრანგეთის კანონმდებლობით, ყვითელი ჟილეტები ყველა სატრანსპორტო საშუალებაში უნდა ინახებოდეს. მოძრაობა სოციალური ქსელის მეშვეობით ჩამოყალიბდა.