მსოფლიო

ე.წ. „ყვითელი ჟილეტების“ პროტესტის გამო საფრანგეთის ხელისუფლება საწვავზე ფასს აღარ გაზრდის

საფრანგეთის ხელისუფლებამ 2019 წლის ბიუჯეტის პროექტიდან ამოიღო გადაწყვეტილება საწვავზე ფასების ზრდის შესახებ ე.წ. „ყვითელი ჟილეტების“ პროტესტის გამო. ამის შესახებ პრემიერ-მინისტრმა ედუარდ ფილიპმა განაცხადა. ერთი დღით ადრე ფილიპმა განაცხადა აღნიშნული გადაწყვეტილების 6-თვიანი მორატორიუმის შესახებ.

„ხელისუფლება მზადაა დიალოგისთვის და გამოხატავს ამას, რადგან გადასახადების ზრდა ამოღებულია 2019 წლის ბიუჯეტის პროექტიდან“,-განაცხადა საფრანგეთის პრემიერ-მინისტრმა.

ცნობისთვის, მთავრობის გადაწყვეტილებამ საწვავზე ფასების ზრდის შესახებ საფრანგეთში მასშტაბური საპროტესტო ტალღა გამოიწვია. ე.წ. „ყვითელი ჟილეტების“ დემონსტრაციები 17 ნოემბრიდან დაიწყო. გამოსვლები გადაიზარდა საფრანგეთის პრეზიდენტის, ემანუელ მაკრონის წინააღმდეგ მიმართულ ამბოხებად. საზოგადოების ნაწილი მაკრონს საფრანგეთის მდიდარი ფენის სასარგებლოდ მიმართულ პოლიტიკაში ადანაშაულებს.

საპროტესტო გამოსვლების დროს სამი ადამიანი დაიღუპა. წინა შაბათს პარიზში პოლიციასა და საპროტესტო აქციის მონაწილეებს შორის შეტაკება მოხდა. პოლიციამ დემონსტრანტების წინააღმდეგ ცრემლსადენი გაზი და წყლის ჭავლი გამოიყენა. სამართალდამცველებმა პარიზის ცენტრალური ნაწილიც გადაკეტეს.

საპროტესტო მოძრაობას „ყვითელი ჟილეტები“ დაარქვეს, რადგან დემონსტრანტებს ყვითელი ფერის ტანსაცმელი აცვიათ. საფრანგეთის კანონმდებლობით, ყვითელი ჟილეტები ყველა სატრანსპორტო საშუალებაში უნდა ინახებოდეს. მოძრაობა სოციალური ქსელის მეშვეობით ჩამოყალიბდა.