მსოფლიო

ესაა იმ ჩუმი რევოლუციის კულმინაცია, რომელიც მიმდინარეობს ირლანდიაში ბოლო 20 წლის განმავლობაში - ირლანდიის პრემიერი აბორტების ლეგალიზებაზე

ირლანდიის პრემიერ-მინისტრი ლეო ვარადკარი ქვეყანაში „ჩუმ რევოლუციას“ მიესალმება. პოლიტიკოსი ასე ეხმაურება ეგზიტ-პოლის შედეგებს, რომლის მიხედვით გუშინდელ რეფერენდუმში მონაწილეთა 69%-მა მხარი დაუჭირა აბორტების ლეგალიზებას.

„ჩვენ ვართ ერი, რომელიც არაა დაყოფილი, ჩვენ ერთიანი ვართ და მზად ვართ ცვლილებების განსახორციელებლად“, - აცხადებს ირლანდიის პრემიერ-მინისტრი.

ვარადკარი, რომელიც ასევე უჭერს მხარს აბორტების ლეგალიზებას, ამბობს, რომ „რასაც ვხედავთ, ესაა იმ ჩუმი რევოლუციის კულმინაცია, რომელიც მიმდინარეობს ირლანდიაში ბოლო 20 წლის განმავლობაში“.

ის აღნიშნავს, რომ ირლანდიელ ამომრჩევლებს სჯერათ და ისინი პატივს სცემენ ქალებს, რათა მათ სწორი არჩევანი და გადაწყვეტილებები მიიღონ თავიანთი ჯანდაცვის შესახებ.

გუშინდელ რეფერენდუმზე ამომრჩეველს ჰკითხეს, სურთ თუ არა ამოიღონ კონსტიტუციიდან ე.წ. „მერვე შესწორება“, რომელიც ნაყოფსა და ფეხმძიმე ქალს სიცოცხლის თანაბარ უფლებას ანიჭებს.

ამჟამად ირლანდიაში ევროპაში ერთ-ერთი უმკაცრესი აბორტსაწინააღმდეგო კანონმდებლობა მოქმედებს. ქვეყანაში აკრძალულია აბორტის გაკეთება მაშინაც, თუკი ქალი გაუპატიურებისა თუ ინცესტის შედეგად დაფეხმძიმდა, ან თუკი ნაყოფს განვითარების ანომალიები აღენიშნება. გამონაკლისი დასაშვებია იმ შემთხვევაში, თუკი უშუალო საფრთხე ემუქრება ქალის სიცოცხლეს, მათ შორის გამოვლინდა თვითმკვლელობის რისკიც (რაც უნდა იყოს დადასტურებული სამი ექსპერტის დასკვნის საფუძველზე).

ირლანდიური კანონმდებლობით არალეგალური აბორტის შემთხვევაში ქალს 14-წლიანი პატიმრობა ემუქრება.