კომენტარი

ეს იყო საკმარისი მტკიცებულება, რომ გიორგი მამალაძესთვის ბრალის წაყენება მომხდარიყო - ნანა კაკაბაძე

უფლებადამცველის ნანა კაკაბაძის აზრით, ე.წ. „ციანიდის საქმის“ თუნდაც იმ ვიდეომასალის ნაწილის გამოქვეყნებით, რომელიც პროკურატურამ გუშინ წარადგინა, ცხადი ხდება, რომ საგამოძიებო უწყებას გამოძიების დაწყებისა და ბრალის წაყენებისთვის საკმარისი მტიცებულება გააჩნდა.

ამის შესახებ ნანა კაკაბაძემ პრესკონფერენციაზე განაცხადა.

„მე ვფიქრობ, რომ პროკურატურამ ის მაღალი საზოგადოებრივი ინტერესი, რომელიც არსებობდა დააკმაყოფილა. გამოძიებამ, ამ ეტაპზე, მიზანშეწონილად ჩათვალა, რომ ამ ვიდეომასალის გასაჯაროება იყო საჭირო. ჩანაწერში ნაჩვენები იყო სწორედ ის ნაწილი, რაც ბრალში აქვს ასახული დეკანოზ გიორგი მამალაძეს. ალბათ, ლოგიკურად სწორედ ამიტომ მოხდა ბრალის წაყენების ეტაპზე, იმ მასალების გასაჯაროება, რომელიც მას საფუძვლად დაედო. საბოლოოდ, სასამართლო იტყვის თუ რამდენად არის მტკიცებულება, რომ დეკანოზი გიორგი მამალაძე იყო დამნაშავე, თუ უდანაშაულო ამ საქმეში. მაგრამ, ჩვენ დღეს შეგვიძლია მხოლოდ იმაზე ვისაუბროთ, რომ ბრალის წაყენების ეტაპისთვის რამდენად იყო ეს მასალები საკმარისი, რომ სისხლის სამართლის საქმე აღძრულიყო და პირს წაყენებოდა ბრალი. მე ვფიქრობ, რომ ეს იყო აბსოლუტურად საკმარისი მტკიცებულება იმისთვის, რომ მომხდარიყო ბრალის წაყენება და დაწყებულიყო გამოძიება, ეს იყო საკმარისი ინფორმაცია“,-აღნიშნა კაკაბაძემ.

მონიკა დავლიანიძე