კომენტარი

ეს არის ერთ-ერთი იმ მრავალი სიცრუეთაგანი, რომელიც ამ დღეების განმავლობაში ვრცელდება - პროკურორი

საპატრიარქოში ჩხრეკა არ ჩატარებულა, ეს არის ერთ-ერთი იმ მრავალი სიცრუეთაგანი, რომელიც ამ დღეების განმავლობაში ვრცელდება, - განუცხადა ჟურნალისტებს მთავარი პროკურორის მოადგილემ, გიორგი გოგაძემ.

გიორგი გოგაძემ ე.წ. ციანიდის საქმესთან დაკავშირებით უწყების ხელმძღვანელის, ირაკლი შოთაძის მიერ გაკეთებულ განცხადებაზე დამატებითი განმარტება გააკეთა.

„გასაგებია, ახლა მე, რასაც ვიტყვი, ალბათ, ამას ეთერში არ გაუშვებთ, მინდა გკითხოთ, თქვენ ხომ უყურეთ, რა განაცხადა ირაკლი შოთაძემ. ამობეჭდილი უნდა წამომეღო, ალბათ და მეჩვენებინა თქვენთვის, რომ მოწმე, რომელმაც მიმართა პროკურატურას, აცხადებდა, რომ იგეგმებოდა მაღალი იერარქიის სასულიერო პირის მკვლელობა.

ჩატარდა ოპერატიული საგამოძიებო მოქმედებები და დღევანდელი მტკიცებულებებით, რაც საქმეზე არის შეგროვებული, დგინდება, რომ იგეგმებოდა, ამას უკვე პირველ პირში ლაპარაკობს პროკურორი, ერთ-ერთი პირის მკვლელობა, შემდეგ იყო დასმული კითხვა, არის აქ საუბარი საქართველოს პატრიარქზე, იყო ასეთი კითხვა დასმული პრესკონფერენციაზე, პასუხი გახსოვთ? არ გახსოვთ? თქვენ თუ გახსოვთ, მაინტერესებს, რომ პატრიარქზე არ უსაუბრია,"- მიმართა გოგაძემ ჟურნალისტებს.

რაც შეეხება, გაუთქმელობის ხელწერილის საკითხს, მთავარი პროკურორის მოადგილემ ჟურნალისტებს უპასუხა, რომ თუ გამოძიება ჩათვლის საჭიროდ, რომ გაუქმება შეიძლება, ამის გადაწყვეტილებას გამომძიებელი და პროკურორი მიიღებენ.

ნინო ექვთიმიშვილი