კომენტარი

ეს არის ანგარიშსწორება ბიძინა ივანიშვილის მხრიდან კვირიკაშვილის და მისი გუნდის წინააღმდეგ - ირმა ნადირაშვილი

ეს არის ანგარიშსწორება ბიძინა ივანიშვილის მხრიდან კვირიკაშვილის და მისი გუნდის წინააღმდეგ, - ასეთ შეფასებას აძლევს „ევროპული საქართველოს“ წევრი ირმა ნადირაშვილი პროკურატურის მიერ ორი სამინისტროს საქმიანობით დაინტერესებას.

დეპუტატის თქმით, პროკურატურა ამჟამად რომელ სამინისტროშიც არ უნდა შევიდეს, ეს ვერ იქნება კორუფციასთან ბრძოლა.

„ეს იყო ძალიან ლეგიტიმური საქმე, როგორც ზურაბ ალავიძის, ისე დიმიტრი ქუმსიშვილის შემთხვევაში, როდესაც საზოგადოებას, არსებული ინფორმაციებიდან გამომდინარე, გონივრული ეჭვი გაუჩნდა ამ ორ სამინისტროში კორუფციული სქემების არსებობის თაობაზე. ეს ჩაითვლებოდა კიდეც კორუფციასთან ბრძოლად, მაშინ რომ დაწყებულიყო, როდესაც ქუმსიშვილი და ალავიძე იკავებდნენ თანამდებობებს, მაგრამ მათ წინააღმდეგ ბრძოლა დაიწყო მას შემდეგ, რაც მათ წააგეს ბიძინა ივანიშვილის კარზე კვირიკაშვილთან ერთად ბრძოლა და შესაბამისად, პროკურატურა რომელ სამინისტროშიც არ უნდა შევიდეს, რაც არ უნდა გამოითხოვოს, ამას ვერ დავარქმევთ კორუფციის წინააღმდეგ ბრძოლას - ეს არის ანგარიშსწორება ბიძინა ივანიშვილის მხრიდან კვირიკაშვილის და მისი გუნდის წინააღმდეგ“,- განაცხადა ირმა ნადირაშვილმა.

ცნობისთვის, მთავარი პროკურატურის საგამოძიებო ნაწილში მიმდინარეობს გამოძიება საქართველოს ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისება/გაფლანგვის ფაქტებზე.

ნინო ექვთიმიშვილი