კომენტარი

ეს არი იყო ბოიკოტი - ეკა ბესელია ხორავას ქუჩის საქმეზე შექმნილი საგამოძიებო კომისიაში შექმნილ ვითარებაზე

იურიდიულ საკითხთა საპარლამენტო კომიტეტის თავმჯდომარის, ეკა ბესელიას განმარტებით, საპარლამენტო უმრავლესობის წევრთა მიერ ხორავას ქუჩის საქმეზე შექმნილი საგამოძიებო კომისიის დროებით დატოვება ბოიკოტი არ ყოფილა და განპირობებული იყო იმით, რომ „ევროპულმა საქართველომ“ ერთპიროვნულად მიიღო გადაწყვეტილება.

„ეს არი იყო ბოიკოტი, ეს არ იყო ჩვენი მხრიდან კომისიის, როგორც პარლამენტის მიერ მიღებული გადაწყვეტილებით შექმნილი ორგანოს მიმართ უპატივცემულობა, ეს იყო ძალიან არაკოლეგიალური, არაკორექტული დამოკიდებულება კომისიის იმ წევრების მხრიდან, რომელთაც ერთპიროვნულად მიიღეს გადაწყვეტილება სხდომების დანიშვნის თაობაზე ისე, რომ ეს არ იყო კონსულტირებული და გავლილი ჩვენთან ერთად“,- თქვა ბესელიამ.

დეპუტატის თქმით, ხორავას ქუჩის საქმეზე საპარლამენტო ოპოზიციამ შეცვლილი დასკვნის პროექტი წარადგინა სხდომაზე.

„ის დასკვნის პროექტი, რომელიც წარმოადგინეს ასე შეცვლილი და ფრაგმენტული კომისიის იმ წევრებმა, რომლებიც წარმოადგენენ “ევროპულ საქართველოს”, ვერანაირ კრიტიკას ვერ უძლებს. ეს არღვევს კონსტიტუციის დადგენილ ხელისუფლების დანაწილების პრინციპს, არღვევს ყველა სტანდარტს, რომელსაც უნდა იცავდეს კომისია“, - განაცხადა ბესელიამ.

არასრულწლოვანების მკვლელობის საქმეზე დეპუტატებმა დღეს საბოლოო დასკვნა უნდა განიხილონ.დასკვნის ის ნაწილი, რომელიც “ევროპული საქართველოს” წევრებმა უკვე გაასაჯაროვეს, საქმის ახალ და სკანდალურ დეტალებს შეიცავს.