კომენტარი

ერთ-ერთი მნიშვნელოვანი დაკვეთაა, რომ პარლამენტი ქუთაისში დარჩეს - გრიგოლ ვაშაძე

საზოგადოების ერთ-ერთი ძალიან მნიშვნელოვანი დაკვეთაა, რომ პოლიტიკური ინსტიტუტები, განსაკუთრებით პარლამენტი დარჩეს ქუთაისში, – განუცხადა ჟურნალისტებს გაერთიანებული ოპოზიციის „ძალა ერთობაშიას“ საპრეზიდენტო კანდიდატმა გრიგოლ ვაშაძემ, რომელმაც კომენტარი გააკეთა პარლამენტის ქუთაისიდან შესაძლო გადატანის საკითხთან დაკავშირებით.

„საპრეზიდენტო არჩევნები ფაქტიურად გადაიქცა რეფერენდუმად იმაზე, რა მომავალი ელოდება საქართველოს. ყველაზე მნიშვნელოვანი ის არის, რომ საქართველოს მოქალაქის დავალებაა, ყველაფერთან ერთად – დავამთავროთ ერთპიროვნული და ერთპარტიული მმართველობა, რომ ჩვენთან არავინ ბოროტად არ გამოიყენოს დემოკრატიული ინსტიტუტები, ქვეყანა დაადგეს ისევ განვითარების გზას. ერთ–ერთი ძალიან მნიშვნელოვანი დაკვეთაა, რომ პოლიტიკური ინსტიტუტები, განსაკუთრებით პარლამენტი დარჩეს ქუთაისში. ეს არ არის მარტო ქუთაისელების და თქვენი მონამორჩილის აზრი, ამას თბილისშიც ბევრი ადამიანი საუბრობს, გურიაშიც და სამეგრელოშიც, რადგან ეს ქალაქი მართლაც ამისთვის არის შექმნილი.

ასე, რომ წყნარად, მშვიდად, დემოკრატიულად, ჩვენს ქვეყანას ეყოფა დაპირისპირება, შეხლა–შემოხლა, ერთმანეთის შეურაცხყოფა“, – განაცხადა ვაშაძემ.